「美國股神」畢菲特喺巴郡擔任主席嘅年薪，26年嚟冇加過，一直都係10萬美金（約78萬港紙），未及財務總監漢堡嘅六分一。至於畢菲特嘅董事袍金，更由05年嘅20.9萬美元，減至舊年嘅11.4萬美元。
不過，作為全球第二大富豪、近年致力慈善工作嘅畢菲特又點會斤斤計較，對現年76歲嘅佢嚟講，富貴可能只如浮雲！畢菲特亦好君真，舊年仲拎咗5萬蚊美金畀巴郡，支付佢喺公司嘅個人使費，如郵費、手機同其他雜費。
其實巴郡副主席芒格年薪都係得10萬美金，財務總監漢堡舊年就加咗5萬蚊人工，年薪66.25萬美金。
巴郡業務去年豐收，股價全年升24%，跑贏標普500指數嘅14%升幅。咁高層領導有功，豈不是可以勁加人工？
錯！巴郡嘅文件寫明，釐定高層薪酬時，係唔會考慮公司嘅盈利同股價表現，公司亦唔會向高層送贈認股權。睇嚟做巴郡嘅股東認真幸福。
[email protected]