汶萊的浮華夢，令志偉回想起年輕時追名逐利滿足無窮慾望的日子，他說：「我啱啱出嚟做武師，有日同個武師飲茶，突然佢接到武指蛇頭電話，話要80個武師，我問有冇我份？佢望住我話：『你何德何能？』」
不甘被看扁，希望賺大錢住靚屋揸靚車，志偉努力發奮，結果由武師做到導演，再擔正做男主角到做埋影帝，但追名逐利究竟是人生動力還是包袱？志偉說：「喺我40歲生日時，突然對人生有反思，假如自己有60歲命，40歲我行咗人生三分之二，咁後面三分一我應該點行呢？」
生前散盡千金
結果志偉在40歲時到台灣出家做了七日和尚，他說：「當人人剃光頭，着埋同一件衫，連講嘢都唔畀嘅時候，你睇唔到佢個人有冇水準，唔會分辨到呢個有錢，嗰個冇錢。」七日禪修令他明白甚麼叫放低。
志偉說：「曾經有個長者同我講過，你嘅錢喺你袋度冇用過，冇使過出去，係唔係你嘅呢？到你入咗棺材，但係你冇使過，你只不過係一個幫人管錢嘅人，一個守財奴嚟。我成日都有個願望，就係喺我生命完結前，使晒我一生人搵嘅錢，使唔晒嘅就捐去慈善機構。」