有心栽花花不發，無心插柳柳成蔭。中日混血兒和田裕美，出道五年谷極唔紅，最令人記得只是會考捧蛋，近日她卻憑主持無綫節目《雪映移城》成功跑出，吸引平均130萬觀眾捧場。在短短五日神奇彈起，裕美表現好壞參半，有人讚她kawaii，有人彈她超低B，不少網民更狠批其三宗罪，但裕美一於少理，還自認：「我次次都係咁符碌嘅！」
上周播完的無綫旅遊節目《雪映移城》，首五集由大馬女主持王翠玲孭飛，後五集由中日混血兒和田裕美帶陪瞓小狗毛公仔Yomiko上陣。沒想到裕美單憑介紹日本東北的松山、鬼怒川和鶴城等冷門鄉村小鎮雪景光極上位，但同時也被網民勁插，指她造作扮可愛極惡頂云云。
網誌點擊率暴升
前日裕美在銅鑼灣受訪時說：「我係跟導演指示做，我都知啲人一係好鍾意，一係好唔鍾意，我做節目只係做好自己，係癲㗎！我由細到大都幾乞女仔憎，自己都會同男仔玩多啲，但都習慣俾人講，冇乜所謂。不過我唔會上網睇留言，我會喊㗎！」
由於近日人氣急升，帶挈裕美的個人網誌（ http://hk.myblog.yahoo.com/iam-hiromi）由節目播出前瀏覽人數不足20 ,000，暴升至昨日錄得逾280,000累積人次，難怪所屬公司高層王晶揚言要捧她做泳兒第二。裕美說：「咁就梗係開心啦！我喺暑假會出碟，真係冇諗過今次特輯會有咁嘅成績，我次次都係咁符碌嘅！」
採訪：朱倬誼 攝影：葉君海
