香港國際貨櫃碼頭公司（HIT）執行董事英子文（左二）噚日做代表，將100萬捐畀香港癌症基金會，贊助喺葵涌瑪嘉烈醫院成立「癌症病人資源中心」，為區內超過2000名癌症病人及其親友提供全面支援服務。相對香港國際貨櫃碼頭嘅盈利嚟講，100萬都好濕碎啫。
講開醫治癌病，香港癌症基金會為咗籌款提供免費服務，話進行「關懷股份」公開招股喎，今個月23號招股，4月12號前後截止認購，目標係想籌3000萬。呢個招股活動，會供銀行、基金經理、金融同保險業人士參與，每位認購嘅善長，都會攞到股份證書做紀念。
連慈善機構都要用「招股」呢個噱頭嚟籌款，可見股市嘅影響力已經深入民心。華華想知香港國際貨櫃碼頭公司會唔會爭取認購埋一份呢？
[email protected]