近年富豪第二代先後被刻意安排主持上市公司記招，最近一亮相即引嚟各方注目嘅，係華置大劉個寶貝仔劉鳴煒。噚日適逢中信泰富公布業績記者會，咁大家亦留意吓小太子榮明杰嘅蹤影，點知主持大局依然係主席榮智健，坐喺佢旁邊嘅仍係范鴻齡同李松興兩個老將，加負責地產業務嘅新上位高層張立憲。問榮太子𠵱家主力負責上海投資嘅小太子，第日會唔會參與多啲中信泰富業務？
范鴻齡：冇人搵我做官
點知榮智健回應，話公司唔係靠一兩個人嘅，佢唔單止希望榮明杰參與多啲公司業務，希望公司其他同僚都多參與，唔知係咪因為中信泰富由中信集團做大股東？雖然榮太子亦持有18.258巴仙股份，始終唔可以想點就點嘛；抑或喺榮太子心目中，雖然小太子已37歲，不過仲係要「外放」多多磨練，先夠班上位？
另外，榮太子個得力助手范鴻齡越做越多公職，又港交所非執董，又行會成員，最近仲多個積金局主席，坊間揣測佢可能最後會俾特首招攬做埋官㖭。不過，范鴻齡噚日喺記招上再度「表態」，話到呢一刻都冇任何人搵佢做官喎。咁又係，榮太子一直咁信任佢，亦大力支持佢回饋社會，換着華華都唔捨得走啦。
講開又講，噚日中信泰富個業績靚靚，派3毫特別股息，榮太子心情自然一樣，佢話：「我都希望為小股東帶嚟更多財富，事在人為啦。」中信泰富午後股價亦應聲升5.46巴仙，最後雖然有啲回調，收市仲係升足1皮，報26.65蚊，升3.9巴仙。
[email protected]