喺澳門搵食，除高級及裝修靚的餐廳之外，一啲走價錢平的食店亦有驚喜，雖然大部份都是茶餐廳格局，但用料及心思絕對唔輸蝕，今次Michael帶我哋去打邊爐、食牛雜麵、馬介休及雞湯米，全部都好正呀！尤其是個手切牛肉，真係令人回味無窮。
澳門通Michael小檔案
Michael是商台叱咤903節目「架勢堂」的客席主持，有少年食神之稱。平日最愛到處搵食，搵食足迹遍布香港、澳門同東南亞。他因工作關係，每星期7日有4日都留連在澳門，所以對澳門瞭如指掌，由他帶路去搵食就最啱。
5手切牛肉味濃必食
囍館位於新口岸皇朝區，即是星際酒店和永利酒店一帶，交通非常方便。開業1個月，即成為澳門的人氣食店，很多歌星喺澳門登台後都指定在這裏搞慶功宴，好似上兩個星期張敬軒同王菀之在澳門開騷，完騷後都在這裏食晚飯。別以為是人氣明星店，價錢就一定好貴，幾廿蚊道菜都幾大眾化，但食物質素絕對不會將貨就價，尤其是手切極品牛肉，絕對落足料。
來這裏必定要試手切極品牛肉，一來用百幾蚊在香港未必食到；二來有多個牛肉部位可以揀，想要牛味濃啲，可以揀全肥唔要瘦；想要滑牛肉，可以揀半瘦少少肥，還有一些別處吃不到的牛部位，好似牛胸油等，諗得出就有機會食得到，這裏可說是牛肉專家。老闆龍哥話：「我哋會派專人去唔同地方搵靚牛，仲會試食牛肉唔同部位，目的都係想帶一啲新口味畀客人。」價錢抵，牛肉種類多，相信這亦是從香港到這裏搵食的最大原因。
極品手切牛肉$158
第一眼見到手切牛肉，就好想將全碟放入口，有多種口味揀，不怕肥的可以叫多肥，入口牛肉味最濃；怕肥膩的可以揀少肥，咬落好嫩滑。食牛肉時先將牛胸油放在湯底滾一陣，然後再淥牛肉，跟住將牛肉跟牛胸油一齊放入口，肯定有味覺新發現。
囍館炒麵皇$48
囍館炒麵皇其實是豉油皇炒麵改良版，加入更多肉絲。最重要是加入了炸亁瑤柱，味道更加豐富，再加點點這裏秘製的XO醬一齊食，味道更上一層。
手打牛肉滑$33
牛肉打到起晒膠，入口夠滑又夠香。牛肉打成膠之後，感覺其實幾似山竹牛肉，蘸些少豉油放入口，嘩！肉汁連豉油直奔喉頭，雖然好易辣親，不過這個食法最好。
囍館（853-28755727）
地址：新口岸飛南第街4號百德大廈F及G舖
營業時間：6pm-4am
6卧虎藏龍家庭店
記得有次去澳門，在雀仔園附近食葡國菜，對個馬介休焗薯茸印象深刻。今次再去，老闆盧生盧太水準依然。由開店到現在仍是家庭式經營，菜式味道好，價錢亦便宜，雖然店內裝修似茶餐廳，不過質素及味道比很多葡國餐廳還要好。想食晚飯要提早預訂，好似之前聖誕節，Booking一直爆滿，「有客人1個月前訂喺新年嚟食，我哋都冇位，真係唔好意思！」盧太話想幫襯最好在出發前打電話訂枱呀！
忌廉馬介休焗薯茸$55
盧太專用大條馬介休，魚肉多且味重，放在薯茸內一齊焗。別看薯茸較深黃，其實先係靚貨，味道比一般的甜。
燒雞釀飯$60
燒雞釀飯好似糯米雞，在雞中釀入西式炒飯，一切開，雞香味連飯香味立即四溢。炒飯用西式臘腸同橄欖等做材料，再加入茄汁炒，茄汁酸酸哋好開胃。
富仕葡式美食（853-28353797）
地址：羅憲新街16號
營業時間：11am-3pm、6pm-11pm
7番茄咖喱牛雜麵好醒胃
澳門有間慈幼小學，為澳門教育出不少人才。不過人才背後其實仲有位功臣，就是新肥仔。別誤會新肥仔是肥佬，講緊的是新肥仔美食。新肥仔開在慈幼小學附近，由老闆兼大廚事頭婆主理，最初開在後巷，後來由舖仔變大舖，不過仍然保持30幾年來的水準。由事頭婆的伯爺一代開始營業，起初只賣中式牛腩粉麵，後來受到葡國統治影響而加入葡式煮法，令牛腩牛雜變得更特別，事頭婆話：「我哋一家人都係做廚，加入葡式做法後，好多葡國官員都係特登嚟食。」特地來新肥仔食飯的，又豈止葡國官員，很多土生土長的澳門人都來回味一番，所以平日午飯時例必爆滿，就算買外賣，起碼要等15分鐘。
雞翼$4.5/隻
用糖、鹽、豉油煮雞翼，還加些少蒜茸，雞翼好香好入味，味道好似BBQ般有陣燒過的味道。
牛雜麵$12
牛雜麵是BestSeller，跟港式牛雜不同，不用柱侯醬等材料，改用番茄咖喱汁，牛雜入味不在話下，番茄咖喱汁更加醒胃，入口甜甜哋又辣辣哋，撈麵或湯麵同樣可以索到汁，好味到連我睡覺也回味緊。難怪每日可以賣上50斤，事頭婆切都切到手軟。
新肥仔美食（853-28973030）
地址：風順堂街14號
營業時間：6am-5:30pm（隔個星期日休息）
8回魂雞湯米
玩了一晚，宿醉又未醒，朝早起來食碗雞湯米，成個人即刻回魂。別以為這裏的雞湯只是一碗普通的雞湯，一朝早起身喝一口，嘩！不得了！整個人都會精神晒，尤其是喝過酒，第二朝來喝一口，立即醒神！
雞湯米$12
雞湯清甜又重雞味，最重要是加了幾片薑，更加醒胃又暖胃。雞湯可配河粉及米線等，不過最好都是配爽口的米粉，味道最夾，最受歡迎。
