的士黃：Hi，成議員，又開完會返辦事處啊？仲一叠二叠文件，真係做議員好似做咕哩咁喎！
成議員：無辦法啦，為咗同大家成功爭取，擔擔抬抬都要照做㗎啦！不過呢啲唔係乜嘢開會文件，只係喺民政署攞咗唔同嘅政府部門宣傳單張同表格，諗住放喺辦事處畀街坊睇之嘛！
的士黃：成議員你真係有心，等街坊唔使山長水遠去攞表。不過話時話，宣傳單張咁鬼多，係咪張張都有用㗎？
成議員：的士黃你都幾有政治觸覺，有啲單張真係好多都好無謂，特別係成張都係宣傳政府政策個啲，又多字又悶，有團體估計過，呢啲單張每年要用幾百噸紙整成，砍咗幾萬棵樹木，真係幾十個政府大球場咁嘅森林都唔夠政府浪費啦！
的士黃：呢個政府係咁㗎啦，把口就講環保，又話要管呢樣管嗰樣，自己咪一樣浪費。講政策，政府成日搬一大堆數據，睇見都頭痛啦，邊個小市民真係會攞住張單張慢慢睇啊？
我哋揸的士，日夜顛倒，最多咪睇吓報紙，乜都知道晒啦，人哋精簡得嚟又好睇，真係畀錢都好過你免費派嘅單張啊！再唔係，聽住電台日講夜講，我哋班的士佬有唔少都可以做名嘴㗎！
成議員：唉，政府就係唔鍾意報紙電台唔受控制吖嘛！政府衰起上嚟就係咁批評，咁佢哋使公家錢印宣傳品又唔使本，佢哋叫呢啲係平衡聲音喎，乜嘢環保都唔記得晒㗎啦！
的士黃：政府講環保就得個講字，係人都知㗎！我早幾日咪講過就快連我架的士都裝流動寬頻上網，𠵱家呢個網上世界咁方便，真係唔明個政府點解唔將啲宣傳品啊、單張啊、政策文件啊，通通擺上網，鍾意咪上網睇囉，再唔係放幾隻光碟喺圖書館，咁就萬無一失啦，使乜浪費咁多紙張啊！
《街坊Hi你》歡迎讀者及各界社會人士分享地區事務個案，本欄將盡力向有關政府部門跟進。
聯絡電郵︰[email protected]