環保團體好鍾意喺星期日開記者招待會，因為星期日一定冇乜新聞，記者開唔到古仔，悶到發慌，乜嘢記者招待會都唔放過，因此好多所謂調查報告就在星期日出爐。上星期日有環保團體話旺角一啲大廈嘥電，特別係創興廣場，要求政府立法，商場廣告燈光要在晚上十一點後熄滅。
左丁山自細在旺角長大，睇呢段新聞笑到碌地。旺角唔開燈就唔成旺角啦。燈光火猛，有減低城市罪惡嘅功效，強性規定晚上十一時熄燈，罪案率上升嘅話，到時邊個人負責？而且環保團體叫物業管理公司慳電喎，等於教非洲森林老虎食肉，有邊間管理公司唔鍾意慳電㗎，你估啲業主與管理公司好鍾意畀電費乎，即使以左丁山咁嘅蚊型公司租微型寫字樓，都慣咗如果冇會開，就唔開會議室嘅光管啦。
因旺角太多人，太嘈雜，左丁山自有能力搬離旺角之後，好少返旺角行街。上星期日睇新聞話波鞋街清拆重建，先知道波鞋街就在花園街與洗衣街一段，由奶路臣街去到亞皆老街前之一條橫巷。呢條橫巷有古仔㗎，以前啲外圍狗馬檔，字花檔就在此收馬纜、狗纜、字花。左丁山阿哥在此俾人老笠咗一隻舊鋼撈。當年左丁山在市建局重建範圍內一間舊樓住板間房，瞓咗十七八年冷巷床位，到大學畢業搵到工之後，先至搬走，與旺角講拜拜。當時嗰個單位已經破爛不堪，石屎隨時會在牆上剝落，天花上，生銹鋼筋凸晒出嚟，十分恐怖。到現在嗰座四層高住宅仍然未拆，都唔知內裏環境破爛到如何境地。好心市建局快啲清拆重建，惠及居民啦！「美而廉」茶餐廳樓上及隔籬嘅住宅大廈，唔記得係七層還是九層高，冇電梯，住在高層嘅長者，每日上落樓根本係受罪。市建局成立嘅本意係照顧舊區居民，並非以商舖利益為優先，何況重建後在原址賣波鞋與運動用品，技術上完全可行，建築師稍為動腦筋就掂晒啦，至於金錢問題，市建局可與波鞋舖老闆簽一個「回購協議」，今日以市價從Ａ老闆買入一個舊舖三千平方呎，三年後以當日市價賣番一個三千呎舖位畀Ａ老闆，差價風險當對賭一鋪啦！