參加校友會春茗，竟然筵開三十二席，認真多人，據主辦單位──校友會──消息，今年第一次透過互聯網發放信息，邀請校友參加，一改以前用電話、傳真、信件嘅作風，果然收效。不過，其中亦有秘訣，就係從歷屆畢業生中，每五年搵一個聯絡人，由聯絡人再去召集同期同學參加，比較容易搵到人。
搞校友會，往往吃力不討好，周時要出錢出力，你話若無感情灌注其中，好難做理事做得耐。至於為何有感情，就要講到學校嘅精神教育，是否打動學生之心咯。
春茗之中，碰到唔少多年未見嘅同學。有一個感覺，就係商界與學術界嘅校友，特別易老易肥，校友中滿頭白髮或肚腩大大者，皆係商界高層與教授級人馬。一啲紀律部門嘅退休高官，位位頭髮烏黑，腰圍頂多三十吋，而且精神奕奕；見到退休警官Ｍ（唔記得佢前年退休之時係總警司還是助理署長）坐喺同屆同學教授Ｌ隔籬，化工公司高層Ｃ對面，嘩，分別大咯，警官Ｍ成個運動健將咁款，仲瘦過畢業嗰陣，做警察果然係健康啲。我哋唔做紀律部隊，亦唔注重運動，有肥肚腩當然係自己攞嚟嘅。
退休校長Ｃ坐在後面枱，好似與同枱中人並不相識。唉吔，原來枱主（負責買餐券請客者）就係大編輯夫婦，夫婦兩人遲晒大到，都唔知去咗邊。大編輯係校長Ｃ嘅中學學生，編輯太太人稱「老師」，幫緊袋巾Ｌ競選特首，連日為三月十五日之論壇忙個不休，做到幾乎唔記得出席春茗咁滯，後來二人怱怱趕到，好似上氣唔接下氣咁款。做政治競選，幾近義工，但工作量多過做報紙記者、編輯，苦差也。不過「老師」每做任何差事，必定搏命到加零一，袋巾梁搵到佢，抵到爛，近日接近煲呔陣營嘅消息人士傳出煲呔嘅顧問費用甚高，數目就冇人敢講。係咁㗎嘞，如果煲呔喺三月一日嗰場答問贏到開巷嘅話，可能有人話啲顧問費用得好有價值呢。一切睇三月十五號，如果煲呔贏唔番一場，佢啲顧問費可能傳到好貴好貴！