憑無綫節目《最緊要正字》打出名堂的新紮才子王貽興，先後與拍檔徐淑敏及港姐曾愛媚傳出緋聞，人氣持續急升，連時裝品牌上海灘也邀請他出席時裝騷。王貽興前晚在Ball場施展八面玲瓏的交際手腕，在場內與初見面的一眾名媛及星爺新寵張雨綺甚為好傾，作家出身的他更拋書包形容前晚出席衣香鬢影的時裝騷，如丫環進入紅樓夢大觀園，大開眼界。
作家出身的王貽興近日憑電視節目《最緊要正字》廣為人識，加上與港姐徐淑敏及曾愛媚傳緋聞，令他人氣急升，前晚更空降衣香鬢影的名牌活動，與星爺新寵張雨綺及一眾名媛結緣。
王貽興前晚單拖往中環ifc出席上海灘07春夏時裝騷，他甫抵達即獲負責公關工作的榮文蔚熱情招待，家住油麻地唐樓的他登陸名人靚人雲集的Ball場，不但毫無懼色，反而火速投入社交世界，一見珠寶設計師陳瑞麟及陳幼堅即識做地說：「久仰大名。」見到打扮性感的張雨綺又能即時發掘話題，與對方談個不休。
眼界大開
「多啲請我嚟就好啦」
記者昨日致電王貽興，他直言前晚置身衣香鬢影的名利場，令他大開眼界，他說：「今次算係正式第一次出席呢類人靚、場地靚、衫靚嘅場合，有份同呢啲名人濟濟一堂，自己好似置身《色慾都市》（SexandtheCity）嗰啲派對咁，好新鮮呀。」
王貽興續說：「前晚見到嘅名人名模，以前都係睇報紙雜誌先見到嘅，見到佢哋原來有啲係真人靚啲，真係令我眼界大開，我覺得自己好似一個丫環入咗紅樓夢大觀園咁，如果啲品牌公關唔覺得我同個場合格格不入，阻住地球轉，多啲請我嚟呢啲活動就好啦，見識多啲，對我寫作靈感都會有幫助。」
無綫力捧
「嚟緊有四個節目喺手」
問到王貽興的近況時，他如數家珍地說：「多謝公司（指無綫）畀咁多機會，嚟緊我有四個節目喺手，一個係同營養師合作主持嘅節目叫《一網打盡》，專發掘啲網上奇怪嘅傳聞，例如手機真係可以煲蛋，另外5、6月會同秋官（鄭少秋）合作一個專介紹世界上不解之謎嘅節目，仲有一個同我寫作身份密切啲，叫《香港筆跡》嘅節目，會用生動嘅方式介紹好多位作家，好似張愛玲同金庸咁，同埋《最緊要正字》反應好，第二輯都籌備緊，嚟緊將會好忙。」
否認大牌
張雨綺演騎呢真人騷
另一方面，前晚以一身性感打扮示人的張雨綺，被問到有報道指她呼喝助手，並嫌公司安排給她的服裝不漂亮時，她即時拉着助手上演一幕真人騷，她先問助手：「我對你好不好呀？」在眾目睽睽下，其助手答：「幾好呀。」張雨綺即轉向記者說：「我當她如姊妹般，如果她結婚我要做她伴娘呀。」
採訪：顏英儀 攝影：陳順禎
青年才子 王貽興
年齡：28歲
學歷：香港中文大學中文系
現職：作家兼無綫藝員
後台：無綫高層樂易玲
撒手鐧：高大威猛，主持、寫作、填詞瓣瓣掂
緋聞對象：徐淑敏、曾愛媚
星女郎 張雨綺
年齡：18歲
學歷：上海戲劇學院附屬舞蹈學校
現職：演員
後台：影壇巨星周星馳
撒手鐧：35D、24、35驕人身材，樣子甜美
緋聞對象：周星馳
