揸得波子的，睇怕銀包都有幾個錢，不過有錢唔係萬能呢個道理，對屬於中上階層嘅保時捷車會會員，卻能夠深深體會得到！
本身係汽車改裝公司負責人嘅阿Ben，同時亦係保時捷車會嘅會員，而保時捷車會每年都會舉行一啲自駕旅行活動，而某次由香港駕車遠征上海嘅活動之中，平時兩餐無憂嘅阿Ben就深深體會到飢餓嘅滋味。
當日一行五十幾部保時捷穿州過省，市區之間嘅路段好難搵到餐廳食肆，即使有餐廳亦唔會有咁多泊車位嚟泊車，加上保時捷架架身價不菲，車主都唔想冒險泊喺路邊，所以好多時就算餓到肚扁都焗住要與餐廳擦身而過，又或者外賣飯盒踎喺路邊食。試過有次揸咗成日車但就連快餐店都搵唔到，個個餓到踩油都無力之際，咁好彩被佢哋發現咗間賣亁糧嘅小店舖，於是成班人即時落車，將杯麵、餅亁等所有食得落肚嘅都掃清，直情「買起」成間店舖咁款！然後上演一幕五十幾個飢民，踎喺總值近千萬嘅保時捷車群旁邊狼吞杯麵嘅諷刺情景。
而據阿Ben講番，當時覺得嗰個杯麵簡直係人間極品，返到嚟香港之後仲特登走去超市買幾個杯麵嚟回味，不過就唔知點解硬係食唔番當時嘅味道囉。
記者：周達之