近年人氣急升的堪輿家麥玲玲，早前老貓燒鬚在鏡頭前睇錯羅庚，遭同行落井下石，她點名力斥宿敵李丞責是金手指，但近日二人竟戲劇性化敵為友，有意食住噱頭合作賣羅庚和風水產品，實行化戾氣為真銀。蘇民峰昨日聞言卻說：「我認為信唔信得過，就要由客戶自己決定。」言語間大有潑冷水之嫌。
近年經常高調宣傳的堪輿家麥玲玲，今年1月在陶傑主持的無綫節目《人傑地靈》中手持羅庚出鏡，但她竟把基本的專業知識南北方向搞錯，在螢幕前出醜，此事令麥玲玲被揶揄為風水界恥辱，專業形象大損。近月麥玲玲接受多份報刊訪問時，點名直指宿敵李丞責是事件的金手指，令二人不和再度升級。
仗義相助
「幫佢挽回面子同形象」
隔空罵戰多時，近日麥玲玲和李丞責的宿怨竟有戲劇性發展，兩人忽然化敵為友，據知麥玲玲被揭發睇錯羅庚後，李丞責曾致電問候，並提出合作生產羅庚，實行暫時拋開私人恩怨，乘勢合作搵真銀。
記者昨日致電向李丞責求證時，他直認不諱說：「我係喺佢（麥玲玲）俾雜誌報道睇錯羅庚事件後，同佢通過電話，我提議佢不如賣羅庚，因為製造羅庚要好專業，咁咪可以證實佢同樣有專業資格，又可以幫佢挽回面子同形象。我仲話如果要幫手，我係一定會支持佢，始終我希望每位堪輿學家都好，咁玄學界先可以做到百花齊放。」
不少生意拍檔都會因財失義，問李丞責可擔心二人商討合作過程會令不咬弦白熱化？他說：「基本上我係一個好公私分明嘅人，坦白講賣羅庚又可以賺到幾多錢？我今次合作都主要係幫佢，出發點唔係為錢，所以應該唔會引嚟利益衝突。」
對於李丞責主動打出誠意牌，麥玲玲看來並非完全受落，她昨日接受電話訪問時，爆料指早在7年前已曾與李丞責商談合作生產羅庚，她說：「當年我有個客人打本畀我，搞賣羅庚同其他風水玄學產品嘅生意，我都搵李丞責傾過，我哋都一齊去過黃山，仲到過一啲廠房視察，後來因為李丞責太忙，件事先擱置咗。」
同行不屑
「我肯做𠵱家發到豬頭」
麥玲玲認為李丞責這次舊事重提，主要是想完成自己的未了心願，她說：「不過佢口口聲聲話為幫我嘅出發點，我都好欣賞，證明佢都覺得我好專業，大家合作又可以互補不足。如果呢次合作可以還李丞責一個未了心願，可以傾吓嘅。」究竟他們的羅庚生意進展如何？麥玲玲說：「暫時仲係好初步，好多細節都未正式坐低傾。」
另一人氣堪輿家蘇民峰昨日獲悉麥玲玲與李丞責合作生產羅庚後，他在電話中說：「賣風水產品呢啲生意梗有得做，當年我肯做，𠵱家發到豬頭啦，不過我就冇興趣喇。」有睇錯羅庚前科的麥玲玲竟賣羅庚，對產品有影響嗎？蘇民峰抵死地說：「有啲人講嘢講到天花龍鳳，咁又有乜嘢用，我認為信唔信得過，就由客戶自己決定。」
採訪：比華利
