蔡少芬（Ada）、陳法蓉同梁朝偉舊愛、息影花旦黎美嫻，堪稱串燒三姊妹，佢哋都係基督徒，所以好鬼好感情。呢排日夜趕拍80集新劇《珠光寶氣》嘅Ada，前日身體不適，喺夜晚7點左右，由兩位姊妹陪同到銅鑼灣睇醫生，幫襯徐斌超中醫，呢位中醫喺香港浸會大學中醫藥學院兼職導師，專係開班教授中醫婦科，睇嚟33歲嘅Ada都要好好保養吓身子啦。
保護黎美嫻
當時Ada同陳法蓉都戴上cap帽，但手持一大袋藥嘅Ada竟然披大褸，認真孱弱，仲要由陳法蓉同黎美嫻左右蹺手而行。佢哋路經銅鑼灣街頭時，唔少途人眼望望。
40歲嘅黎美嫻息影多年養尊處優，前年至同「元朗舖王」謝興肇結婚，估唔到結婚兩年已經變成師奶，素顏嘅佢一臉倦容，着住街坊裝兼踢拖，個樣比病咗嘅Ada更憔悴。
其後串燒三姊妹行去恒隆中心嘅銀行櫃員機，陪黎美嫻㩒機提款，可能Ada唔想朋友擔心，向黎美嫻扮精靈講笑：「你過數畀我呀？」點知呢個時候發現記者，Ada就做出勝利手勢兼同記者講：「唔好意思呀，你哋都影咗啦，畀我走啦。」黎美嫻仲突變驚弓鳥，Ada即刻護駕：「唔好影佢啦好冇？影我啦！」之後三個女人加快步伐去停車場攞車。
