▲勾出A地盤嘅會德豐，當然想買到塊地，唔知係咪坐喺山頂位置，喺第27口同第28口價嘅時候，雖都有舉牌，但拍賣官硬係睇佢唔到，分別畀咗28號牌嘅嘉華同33號牌嘅華懋。反而負責即時打電子顯示嘅拍賣官助理眼利，見到會德豐先承第28口價，並即時打咗出嚟，同拍賣官嘅口徑不一致，一時間搞到全場都唔知點。不過，始終都係拍賣官最大，助理惟有改番。會德豐惟有承第29口價啦。
不過，最後都投唔到，前後承咗5次牌就冇咗影，執行董事黃光耀（圖）就話唔失望，不過，會德豐都唔算輸晒，話晒佢都係第一次成功勾地，好嘅開始係成功嘅一半，嘉華就係最好嘅人辦，今次唔得咪下次再嚟，再唔係可以搵人合作，有人分擔風險，舉牌都勇啲，成功機會咪大啲囉。