呢個三月天，既是暮春，又是霧春，天氣乍暖還寒，大家在石屎林中生活，可能未知季度已轉、春花已開！某日行過深水埗石屋日本料理，新推一系列花之魚食，好似想提提大家，春花春菜已來！
記者：朱崇德
攝影：陳偉強
Model：Naomi
三色花之戀$38
以三文魚、鱆紅魚及吞拿魚圈成花之戀的形態，面撒厚厚一層鮮蟹子，上枱時已覺得似一朵綻放中的玫瑰！一口吃下，三文的肥美、鱆紅的濃魚味及吞拿的甘香，以日本沙律醬作混和調劑，肥美鮮滑！更特別是面放的「綠冠」，原來是以蘿蔔鬚細砌而成，能減輕魚身的油膩感，想得幾周到。
魚生砌花靠手藝
到深水埗呢啲舊區，想砌電腦或者會過嚟搵吓零件，但係要搵食？好難想像會走到過嚟。最近刻意走過一圈，近黃金、高登商場一帶嘅食店開到其門如市，當中以福榮街至大埔道一帶最旺，最多嘅係日本料理，好多都走中、高檔次路線㖭！
求教石屋經理Andy：「咪睇呢度係舊區，其實附近有好多貿易、製衣公司，午市呢度係打工仔飯堂，逢入夜就變為老闆級菜館，所以用料要達中、高檔次，喺呢區先企得住！」
入到石屋，明顯走日本古樸石景裝飾，日本風味濃到化不開；咪睇樓面、廚房比較後生，個個都有10年以上做日本料理經驗，加埋靚魚生、日本飛機貨，食物出品真係有一手：「做日本『花』之魚生、壽司，一半係為應節；其實要做得形神俱似，廚師嘅手藝，可以話係做日本菜的靈魂所在！」
雪中牡丹蝦$48
將手指般粗的牡丹蝦生切兩段，再包着以日本葛絲香炸而成的香粒，入口有點點似炸米粉，但又有天婦羅的香脆口感；食到入心，牡丹蝦仍是全生，以保其嫩滑鮮美之風味；平時1隻牡丹蝦做刺身都要$40客，$48可算抵食。
池魚刺身拼盤$128
一條12"長的池魚，薄切卷成花狀，都幾考師傅的手勢，平時一般料理都要過$100客！呢度仲會再配以各3件半吋厚的三文、吞拿、鱆紅、劍魚腩等新鮮魚生，絕對係平價飽肚首選。
辣酒煮翡翠螺$45
中式酒煮花螺大家食得多，紹興酒配花螺，味道有點悶；今次改用日式做法，以日本清酒作底，配以如4隻手指般大的翡翠螺（6隻），呢個煮法好處係清酒的酒味較香濃，嗜酒者必傾心，而且翡翠螺比花螺較耐火，長時間燜煮入味之餘，又不減螺肉的脆口。
黑豚肉天婦羅大葱$38
貴價質優的日本黑豚肉，肥、瘦相間，以慢火煮5小時，將香茅、味醂、日本油等調味料慢慢扣至入味，入口油滑豐潤，肉味香濃，配以炸作天婦羅的大葱拌食，令其油膩感大減。
間八甜蝦壽司$28
日文的所謂間八，亦即我們所稱的鱲魚，以鱲魚配甜蝦作壽司，蝦味鮮而不濃，配以鱲魚的清口魚肉鮮味，兩者味道不會互搶，感覺幾夾，食得一口鮮香。
食神評級（5粒★為滿分）
價錢★★★★
食物★★★★
服務★★★
裝修★★★
讚
味道、用料都用上等貨色，出品都做得唔錯，可媲美好多高檔次日本料理，加上價錢唔貴，真係幾抵食。
彈
雖然都近深水埗地鐵站，只5分鐘腳程，感覺要特登去，位置都幾吊腳。
石屋日本料理（27480800）
地址：深水埗大埔道87-91號裕發大廈地下（永隆銀行側）
營業時間：星期一至日12nn-3pm、6pm-12mn
