第二場答問大會應該向兩會學習，出通告提醒與會者別中途瞌睡，見到隔籬友流晒口水zzz聲大作，即刻推醒對方實行「擾人清夢」，不要讓嚴肅的政治會場淪為「釣魚場」。事關兩會那批代表已經夠樣衰，無謂再跟「金魚佬」搞上關係。
答問最怕悶場，影響市民電視送飯，說不定招惹秀茂坪或者調景嶺的熱心居民，向廣管局投訴，指答問會過份政治渲染，影響食物落格，造成胃痛，引致明日不能上班，工作效率大受干擾，甚至因為睇一場答問騷而飯碗都冇埋，勞資雙方各執一詞。這樣的社會「效應」，斷非曾梁陣營樂於見到。是以答問大會應當臨場變出花樣，讓市民觀眾有驚喜，沖淡悶翳的黃梅濕氣，在會場展現一爿政界中難得一見的藍天。
如何臨場變招呢？最好請兩位候選人即場煮番幾味代替重複得個講字的政綱。從選擇的菜式可以看出治港功夫。揀大鑊飯的，師奶都知，肯定是大路貨走街坊路線，談不上願景，醫肚最實際。這樣就唔驚對方會大灑公帑起什麼西九。揀九大簋的，個半鐘邊夠時間起貨，肯定是吹水王，冇句真。假如因為時間關係已經預早整定，冇真人示範擺明出貓，誠信打個五折都嫌少。有自知之明求其煮個荷包蛋充數的，以為捨難取易，其實荷包蛋最難炒得靚正，冇超凡手藝，實聽黐鑊撈出一碟蛋散來。我估曾特首會煮生米當熟飯，梁家傑冇得埋爐，只能煲冇米粥。