當年誰會想得到手機最終不只用來傳收信息，更被用來襯衫，除了實用價值，更成為一件Accessory。一早看穿冇得追，手機日新月異，一旦開始了追潮流、追科技便一開始一開始不可再終止，像追Nike一樣，你追得快，它轉款更快，所以在多年前遇上了Nokia6108手寫板電話後便海枯石爛，至死不渝。
當年Nokia6108曾威盡一時，手寫板裝置令我這等中文輸入白癡如獲至寶，文字庫更堂堂正正地容納了廣東五大粗口字，諧音「渺咪踎物吻」，其實廣東粗言雖如黃河之水又變化萬千，但所有組合其實只來自這五個門字部首的字，萬法歸宗，兩儀生四極，四極生八卦。Nokia6108誠實可靠，UserFriendly，打電話傳短訊均可單手搞掂，配套簡易齊全，日曆記事、電話簿、字典操作方便，又因為甚麼相機、上網、聽歌、洗腎所有跟電話無關的功能一概全無，正如科技泡沫爆破時流行的名言：「HighTech揩嘢，LowTech撈嘢」，少樣嘢就少樣嘢壞，越低科技就越少麻煩，Nokia6108絕少頭暈身㷫，輕微碰撞亦盡可頂得住，這樣好的一台電話，唯恐世人貪新忘舊，廠方終有一天會停止生產該型號，有見及此，委託朋友唔好講咁多，一口氣購入六台作後備之用，以防萬一，總之每朝早起床見到多台6108安坐家中候用，心中便覺踏實，但人算不如天算，如斯萬全之策，竟還會有漏洞，令我在送狗迎豬的期間動換新型號電話之念，加入HighTech揩嘢之行列……