作為一個汽車維修技術員，每每見到嘅都係一堆機器，就算架車幾舊幾殘幾爛都好，都唔會有乜特別嘅感覺。不過從事汽車維修16年、現時任職於萬事得嘅陳先生，就體驗過唔少令人傷感嘅修車經驗，因為佢試過有次喺車裏面發現一條死屍！各位唔好驚訝住，因為陳先生所發現嘅並唔係人屍，而係一具貓屍。
停一停、諗一諗
事件發生當時正值寒冬，而貓屍係喺引擎旁邊發現，所以照陳先生估計，當時應該係因為隻貓仔為咗取暖而喺車底鑽入引擎附近，碰啱車主返嚟，結果開車時被活活捲入皮帶絞死。意外嘅嘢本來係人都唔想，只係慨嘆香港車主大部份都無乜憐憫之心，因為呢種情況其實並唔少見，好多車主甚至開車之前已經聽到貓叫聲，只係好多時都嫌麻煩懶得趕佢哋出嚟，寧願「開行」引擎諗住Fing到佢哋跌落車，動物嘅生與死喺佢哋眼中完全唔當係一回事，到捲入皮帶整壞部車時反而埋怨班小動物連累佢破財。
無論係人定係動物，生命都應該得到尊重，當係為動物着想也好，為自己架車着想也好，下次各位車主聽到架車有貓或者其他動物叫聲的話，不妨停一停，諗一諗，花少少時間Check吓部車，咁就可以避免糟蹋生命，同時亦可以避免糟蹋架車。
記者：周達之