甄子丹同古天樂主演嘅《導火線》（前名《破軍》）超支超時，最近先至全部拍晒，因為部戲拍得太長，據知身兼監製、動作導演同主角嘅甄子丹，為此剪咗唔少古仔啲文戲，但盡量保留番可以賣埠嘅動作場面。呢個做法據聞令到身為導演嘅葉偉信唔多高興，加上喺拍攝現場甄子丹又要話晒事，兩個導演爭拗多多，更有指葉偉信試過嬲到劈炮離場。
各有各剪否認不和
馮仁昭收到風後，即時致電幾位當事人求證，甄子丹話：「冇呢回事，大家合作得好愉快，嚟緊9月仲會合作部新戲，加上都未開始剪片，完全冇呢回事！」葉偉信都話：「點會咁㗎？梗係唔會啦，大家不知幾開心。」
對於有傳甄子丹剪晒其他人嘅戲，只將戲份集中喺自己身上，葉偉信就話：「冇咁嘅事，因為動作佢熟啲，但其實大家都會剪一個版本，睇吓邊個版本會舒服啲。」
黃百鳴埋怨超支
雖然兩位導演都否認不和，但電影公司老闆黃百鳴就明言甄子丹同葉偉信都係競爭對手，佢話：「套戲係有超時超支同超期，不過唔係佢兩個不和，係佢兩個之間互相競爭，大家都想自己嗰部份拍出嚟理想，所以對我最唔公平，因為超支。」佢仲話部戲啱啱完成，日內會進行剪片。
