呂方舉行的四場演唱會中，不時有觀眾大呼鄭裕玲（嘟嘟）的名字，前晚的嘉賓張學友更選唱《你的名字我的姓氏》來催婚，又稱呼嘟嘟作「呂鄭裕玲夫人」，令嘟嘟甜到入心。自詡浪漫的呂方也在舞台上公開答謝嘟嘟，大讚她溫柔，又表示求婚要講衝動，到時便會娶嘟嘟。
呂方一連四場紅館個唱「呂方好情歌演唱會」前晚圓滿結束，吸引不少圈中人往捧場，包括梅雪詩、戚美珍、周麗淇、陳雅倫、吳夏萍、庾澄慶及廖啓智陳敏兒夫婦等，還有曾與呂方傳緋聞的Marianne。
「其實好溫柔」
呂方忍了四天，終在尾場致謝辭時公開答謝女友鄭裕玲，他說：「梗係要多謝嘟嘟姐啦，唔好睇佢平時好英勇、好女強人，其實佢好溫柔，係一個好人，講嘢同我一樣比較直，對我好好，對朋友好好。」全場觀眾聽罷即拍掌歡呼，坐在嘉賓席的嘟嘟則不斷甜笑。
21年前曾與呂方一起在紅館開演唱會的張學友，前晚也有到場擔任表演嘉賓，學友在台上說：「本來我想唱舊歌，但睇到草蜢同咁多嘉賓都祝福佢結婚，我都要跟進吓，揀首啱結婚嘅歌催吓佢，係《你的名字我的姓氏》，呂鄭裕玲幾似啲總理呀，好旺呀。」其後現場燈光打向嘟嘟，學友見狀笑說：「唔好意思，唔知你喺度。」呂方答：「唔使唔好意思，結婚好正常。」學友說：「呢首歌送畀呂方同嘟嘟姐，呂鄭裕玲夫人，第時要在場唱呢首歌，我即刻到。」
個唱結束後嘟嘟沒有出席慶功宴，但呂方仍大讚女友說：「佢好好人，唔係你哋想像中咁硬淨。」很少人感受到嘟嘟的溫柔？呂方謂：「梗係啦，呢啲留番畀我㗎。」
自認鬼馬浪漫
呂方又表示暫未有結婚準備，他說：「𠵱家真係未註冊，求婚要講嗰吓衝動，要好突然咁，例如雨中漫步，我份人又鬼馬又浪漫㗎。」
此外，呂方昨日接受商台電話訪問時，笑言演唱會嘉賓都變成他的父母，經常向他迫婚，之後被問到會否結婚時，呂方笑說：「結、結……」
採訪：李珮洳 攝影：林德雄
