上禮拜六場英足盃，我求大俠晨咁早就擔定櫈仔霸定頭位，諗住睇中國「紅魔鬼」董方卓處子登場，為曼聯出戰米杜士堡，點不知都係中「空寶」，非但唔見佢落場，就連名單都冇佢個名，真係失望到爆！不過好彩，仲有個軒歷拿臣（簡稱拿臣），雖然佢嘅表現普通，仲以1個插水動作換來1面黃牌，結束短暫既曼聯生涯，但我求大俠同曼聯躉一樣對佢依依不捨。
話說場波開始之前，不論係國內或者國外嘅傳媒都話「小董」有機會上陣，加上「老費」賽前又話佢身體點好，有速度又有技術，搞到「小董」真係好似會落場咁，雖然最後佢榜上無名，不過以曼聯現時前線嘅陣容，得番朗尼可用，而阿倫史密夫又唔得費Sir歡心，睇嚟「小董」距英超登場日子已經不遠矣。
足總盃場波最終2:2和局收場，下星期一重賽。對於約滿嘅拿臣，「老費」就話：「拿臣返去希爾星堡，對曼聯嚟講係好大嘅損失。」咁又係呀，拿臣效力曼聯10個禮拜，表現惹人好感，換轉係我都唔想佢走啦。不過事實終歸事實，「老費」不如畀「小董」一個機會，或者會有意外收穫都唔定！