今日樂壇新人，只出了一張唱片便有機會在紅館開騷，但在樂壇唱足25年、攞白金唱片攞到手軟的林志美，卻一直未有機會一圓其紅館個唱夢，兩者相比，實在是一大諷刺。80年代憑《感情的段落》走紅的林志美，日前接受訪問期間，流露出她對在紅館開演唱會之渴望；而感情生活上，她還未有着落，因為她嚮往自由，因為她是一隻沒有腳的雀仔。 採訪：戴彩煥
林志美82年加盟CBS新力唱片公司後，即被安排與當時得令的蔡楓華合唱《愛的火花》，同年她首張個人大碟中一曲《感情的段落》，更是林志美成名之作，令她一出道便取得白金唱片成績，有機會跟關正傑、譚詠麟和徐小鳳等唱家班在頒獎禮上同台攞獎，星途無限。
「蔡楓華好誇張」
不過，日前林志美接受專訪時，透露首次錄音經歷原來毫不順利。林志美笑說：「我入CBS之後，就被安排同蔡楓華合作唱《愛的火花》，但我第一次係同唔到佢一齊錄歌，因為佢（蔡楓華）一唱到個『火』字，個嘴就好誇張、好好笑，笑到我收唔到聲，結果要分開嚟錄。」
89年林志美為CBS推出最後一張唱片後至今，雖然斷斷續續出過兩張專輯，但林志美並非人間蒸發，也不是退隱江湖，由始至終，她也沒離開過樂壇半步。林志美說：「呢段時段，我都有寫歌、做監製、去外地表演。其實，我都去日本傾過唱片嘅事，劉以達亦有搵過我拍檔，但自己想靜一靜。之前有人以為我因為唔肯轉歌路，所以同以前唱片公司搞得好唔愉快，但其實係誤會，我自己成日都想有突破。好似好多人認為以前歌手應該唱番以前啲歌，咁就最穩陣，但自己唔得，每一次創作，我都想加入啲新嘅元素，就算唱《你的眼神》，都可以有唔同演繹方式。」
去年林志美加盟廣州一間唱片公司，推出了《原美主義》專輯，由於反應理想，林志美正積極籌備下一張新唱片以饗知音。
從未涉足紅館
今日的樂壇新人例如側田，只出了一張唱片便大鑼大鼓在紅館開個唱，對比起入行25年、攞過無數白金唱片的林志美，卻從未有機會涉足紅館，會否為自己忿忿不平？林志美笑道：「咁又未去到嗰個位，人哋識得把握時機啫！始終開演唱會好大壓力，唔知會唔會好多人睇。成日都有人問我幾時開演唱會，問心講，自己都好想，但要睇吓製作公司有冇誠意去傾囉！有機會我都想試吓。」
近年樂壇被指抄襲成風，身為創作人的林志美，一聽到「抄襲」二字即眉頭一皺：「梗係唔好啦！係咪抄，自己一聽就知，好唔鼓勵，其實呢啲事有好多人要負責，作曲嘅人同唱片公司要自律，傳媒都要自律，點解知道首歌係抄都要播？重要谷到hit晒！」
抄襲不能接受，版權問題亦要重視，外表看來容易欺負的她，近日便因為追討版稅而採取法律行動，林志美說：「有間細嘅唱片公司，抽咗我啲歌出精選唱片，唔畀應得嘅報酬，自己好無奈，好唔開心！呢個係合約精神同責任，如果唔係咪白做？我已經交咗畀律師處理，希望可以快啲settle件事！」
沒有腳的雀仔
唱情歌唱了千遍萬遍，單身多年的她，感情又去到哪一個段落？林志美聞言即耍手擰頭不想多講，揚言自己是個愛自由不怕悶的人，當記者笑指她是隻沒有腳的雀仔時，林志美瞪大眼興奮地拍手笑說：「係呀係呀！形容得好貼切！」
攝影：陳偉權
髮型：PerryLaw@SuaveHairNails
場地：帝京酒店LaFontana
本欄逢周二刊出
