估唔到啩，原來國產機都可以玩得有聲有色，仲好有「趨勢」㖭！最近途經手機場，電眼一掃，水貨Product都係來來去去嗰幾味。
不過，3月份有超過7、8個人去問：「有冇雙插卡嗰部728（都寶728）？」心諗，又唔係諾記，亦唔係索愛，叫都寶728啫，有邊個人識？
錯晒，估唔到雙SIM機種由SAMSUNG水貨玩到國產不知名牌子，終於有出頭天。聽番Sales解釋，班玩家咁鍾意728，其實除咗可同時用兩張GSMSIM卡之外，另一原因係價錢夠晒平，開價$1,180，𠵱家當兩部手機咁用，當一部為起$590，又夠慳位，粗粗哋用抵到痹！
呢兩日仲返多一部龍翔T158，分唇同樣玩一機兩SIM同時間操作，機面處更追加早被國產機遺忘的數字Keypad，打電話時不再靠Stylus逐粒掣「咪」落去咁煩，附加機背鏡頭達到200萬像素，質素預咗冇大牌子咁靚，但有好過冇。
喂，兩款機同樣賣$1,180，唔使特別分析啩！
記者：陳國輝
樂進（23806098）