所謂智者千慮，必有一失；車路士領隊摩連奴前晚3:3和熱刺場英足盃，被指用葡語鬧球證納利係「狗養的！」佢事後話呢句唔算粗口，咁都兜得番？
葡語“filhodaputo”即係英文“sonofawhore（狗養的）”咁解，摩連奴下半場喺場邊就係咁鬧納利。佢被踢爆後仲直認不諱，話呢句說話喺葡萄牙好普通，自己都成日咁鬧自己、球員，甚至射波中楣，都會拉埋隻狗落水。
文化差異也好，特登又好，個底已經花晒嘅摩連奴又有咩所謂？對佢嚟講，最緊要係贏歐聯冠軍。於是呢位葡萄牙領隊喺熱刺賽後，嗱嗱臨去西班牙睇華倫作客和奧沙辛拿場波，為歐聯8強作準備，認真頻撲。
另外，大家有冇發現摩連奴呢排一句批評球員嘅話都冇呢？原因好簡單，摩連奴1月同球會高層反面後，球員都企晒佢嗰邊，你話呢位蠱惑領隊，又點會得罪呢班自己友呢？好似隊長泰利續約問題咁，摩連奴亦將個波交畀球會，「事情的確有變化，但係雙方傾緊。」梗係喇！如果佢夏天離隊，分分鐘會拉埋對方走。續唔續約？關我鬼事咩！