儍姑級選美佳麗「導演」最近成功搭上「脷」公子，好高調咁四圍去，原來「導演」咁冧「脷」公子除咗對方家財唔錯外，最抵得諗係隨傳隨到。一向孤寒嘅「導演」朋友鬼咁多，飯局應酬梗係在所難免啦，佢每次同啲女性朋友食飯，食飽飽撩緊牙時就會自動波打畀「脷」公子，叫佢嚟埋單。最初班女性朋友覺得「導演」志在演嘢，證明「脷」公子有幾貼貼服服，隨傳隨到，但係「導演」真係使得唔好嘥，連一餐百零蚊嘅咖啡茶錢都要「脷」公子仆到嚟幫佢找數，難得嘅係「脷」公子真係每次都冇甩拖，「導演」銀包慳番唔少又有面，今次真係標尾會嘞。
撰文：阿蘇
本欄逢周一至六刊出