黎明的新舊女友樂基兒和李嘉欣昨晚同在中環出席珠寶活動，但經大會悉心安排，最終緣慳一面。心情大靚的嘉欣對安排似乎不領情，謂大會毋須分開她倆，因為她絕對不介意跟樂基兒同場。
黎明的女友樂基兒及其過氣緋聞女友李嘉欣，昨晚同往中環出席adler珠寶活動，早前嘉欣讚樂基兒敢做敢認隆胸是「坦白、可愛」，但昨晚大會精心安排，兩人緣慳一面。樂基兒行騷後返後台不夠一分鐘，嘉欣才現身。問樂基兒事前是否已知道跟嘉欣同場？她說：「撞到都冇所謂，大家喺埋同一個行業，成日都會撞到。」假若面對面，兩人會有甚麼話題？她說：「都唔知講唔講到。」
為亨亨設計珠寶
以一身價值16,200元Dior低胸裙現身的嘉欣，心情勁靚，她笑說：「好緊張，見到你哋心口滴汗呀。」問她其男友許晉亨有沒有送她珠寶？她說：「係男友送禮物畀女友都離唔開呢樣板斧，佢（指男友）都有送珠寶畀我，背後仲有個屬於我同佢之間好有意義嘅古仔㖭，呢樣嘢係其他男人做唔到，要好細心嘅人先至做得到。」
再問有否收到男友的求婚戒指？嘉欣說：「送禮物送公仔都得，唔一定係要戒指，呢個問題你哋應該問啲拍咗拖10年8年嘅人，我哋都未夠一年。」會否閃電結婚？她說：「唔會，𠵱家天朗氣清。」她又大讚男友浪漫細心，她說：「好似佢送畀我嘅珠寶係要特登坐飛機去訂，再第二次坐飛機去攞，同埋係獨一無二嘅，總之好浪漫。」說罷隨即掩口笑說：「死啦，爆咗佢呢條橋，唔知日後仲有冇得收呢？」問有興趣設計珠寶的嘉欣，其第一件珠寶作品會否為男友設計？她說：「做咗啦，不過冇佢咁有心思。」
「呢啲係人生經歷」
問嘉欣究竟亨亨是否人生中最浪漫的男友？她說：「佢都屬數一數二，不過之前嗰啲都好浪漫。」有記者問她跟亨亨最近似乎低調了，她說：「係你哋影厭咗啫。」那現在是否三成時間工作，七成時間拍拖？她說：「掉番轉七成時間工作都得㗎，我唔會推job，只會推男友約會。」叫她評分給男友時，她說：「佢又唔係學生。」最後問她與樂基兒無緣合照見面，她說：「其實毋須要分開我哋，又唔係第一次撞到，我都估到報紙又會寫番我哋乜嘢品味相似，不過再提都冇問題，因為呢個的確係我人生經歷嘅一部分。」
採訪:顏英儀
攝影:陳順禎
