日本銀行家請食飯，到鏞記對面一間日本料理，飯後行出嚟，見到樓神一個人離開鏞記，於是企定定等佢過馬路，同樓神握手，希望接近吓一啲旺人旺氣，成為「稿神」都唔錯吖！新春未過晒，當然有好多新願望、新希望，統稱為「願景」，可惜好多「靚人靚景」遠睇就冇得彈，近距離檢視就知道空洞虛假，嚇到自己走夾唔唞。做稿神喎，冇咁易，點同陶傑揮呀？某日與佢一齊食飯，佢話要趕一篇稿，於是埋單，走上左丁山寫字樓，佢拿出兩張白紙，喺會議室坐低，立即下筆如飛，話咁快就搞掂，傳真畀《蘋果》之後，拜拜而去，左丁山翌日睇番「黃金冒險號」，唉，正正正，以左丁山咁嘅天份，再學三十年都寫唔到。
黐吓樓神，果然學到嘢。樓神話以前跟珠寶T學習到一招半式。珠寶T鍾意喺老牌珠寶店C記隔籬開分店，租親舖就想租在C記左右。咁有乜好處呢？原來C記財雄勢大，有大筆宣傳經費，時時賣廣告推銷，吸引唔少遊客及買家。珠寶T認為，啲買家未必喺C記睇完就立即落手買嘢嘅，好可能會行過隔籬（即係珠寶T舖頭）睇吓，格吓價，珠寶T當然會將啲價錢㩒低，肯定平過C記啦！
咁嘅招式，叫做攝位食住上，年中唔使賣廣告都搶到唔少生客。呢招用於賣樓，得唔得呀？樓神話：「都掂㗎，𠵱家S記猛賣廣告推出新盤，相距冇幾遠就有人推出十零二十個貨尾單位，試吓試吓咁，賣得出又繼續推多啲。啲買家睇完S記廣告，話唔定會睇埋新盤附近嘅現樓貨尾呢，人哋出廣告，你賣樓，仲唔係用珠寶T嗰招？」
唔怪得香港有咁多樓神，位位樓神都要頭腦精靈，反應快，度完新橋又識得搭順風車食住上；現在賣樓唔係以前白手套黨、牙籤黨排隊霸櫈仔時代，要絞盡腦汁先至𠱁到人買樓。冇神仙級數，點可以主持樓盤推銷！