老死Euginia同我都係刺身狂，閒時我哋最鍾意鬥搵食，只要其中一人搵到刁鑽又好食的刺身，另一方就要請客，最近我成了大輸家，因為Euginia居然搵到一間新開張不久的日本料理，佢哋嘅刺身來自世界各地不同地方，波士頓來的青口、阿拉斯加蝦、北海道八爪魚，一餐可以試勻各地刺身，呢餐我輸得心服口服！
記者：甘露露
攝影：伍慶泉
Model：Euginia
來自各地的刺身
要找這隱身在橫街內的日本料理店，的確有點困難，在左問右問下，終於發現了這間在車房隔鄰的小店，雖然位置有點偏僻，但直覺告訴我，越刁鑽越有新發現。果然，我的直覺都幾靈光，與大廚阿藍閒聊，知道店內主打的全是季節性海鮮刺身，「我們會依照不同季節推出不同的時令海鮮，好似山刀魚、眼仁奈、鷹之羽鯛、黑色本象拔蚌及八爪魚等。除日本之外，邊個國家海鮮當造，我哋都會攞貨，但只會揀海水無污染的地方。為確保新鮮，每次只會取夠1晚用的份量。」
午市套餐前菜任你食
除了時令的刺身之外，店舖每日下午都會有17款不同的午市套餐選擇，包括野菜沙律、前菜、主菜、麵豉湯、咖啡或茶。前菜共有3款，全部任攞任食；主菜由天婦羅、鐵板燒、魚生拼盤到箱押壽司都有。如果食完主菜都仲未夠喉的話，可以再翻食前菜食到飽，套餐價錢由$58至$128不等，不另加一收費㖭，都算幾抵㗎。而個人推介必食魚生拼盤，有帶子、三文魚、赤貝、油甘魚、甜蝦及其他共7款刺身，淨食魚生都飽晒啦！
鐵甲蝦刺身$120/4隻$30/隻
食開的日本甜蝦蝦身又幼又細隻，相比起這種阿拉斯加鐵甲蝦，日本甜蝦的確有點失色，論外形，鐵甲蝦比它大1倍，蝦肉厚身之餘，肉質爽滑鮮甜，啖啖肉比甜蝦有咬口得多，食1隻拍得住食2隻甜蝦。
八爪魚刺身$78
這裏的八爪魚每日由日本神奈川縣新鮮生猛運到，這季節神奈川縣的八爪魚最肥美大隻，肉地雖厚，但咬落不會有韌且「嚡」口感覺。先用鹽清洗，再用水浸15分鐘，令八爪魚保持爽脆鮮甜，粒粒鮮味十足。
藍青口鐵板燒$68
這款來自波士頓的藍青口當然有其過人之處，它勝在冇沙粒，Size雖然較的骰，但肉質比其他國家的品種嫩滑鮮甜。加入炸過的蒜粒、黑椒，用牛油炒香，青口肉鮮甜帶惹味的蒜香，講真，好味過用豉椒炒呀！
其他日本海鮮大晒冷
（a）角螺$268/隻（約手掌般大）
日本九州角螺大大隻，將肉切薄片做刺身味清甜又爽脆。
（b）象拔蚌$368/隻（約1斤重）
日本養殖的象拔蚌同市面的加拿大種一樣，但日本這品種Size較小，肉鮮有嚼勁，最好係連膽亦可以食埋，無嘥。
（c）海膽$168/客（約3板）
單看這裏的海膽，「身形」明顯比一般食到的粗和豐腴，入口即溶甘甜，1客約有4至5片。
（d）赤貝$40/隻（約150克重）
赤貝新鮮即叫即開，與我食開的相比，這裏的肉質較爽口，入口原汁原味。
（e）毛蟹$600/隻（約1斤重）
北海道肥美毛蟹當造期只到3月尾，所以要食要趁早，爪會用來做刺身，蟹身則用來蒸，記得2日前預訂。
食靚魚生識揀位坐
講起食我最興奮，席間阿藍還過了幾招食魚生揀位坐的秘笈畀我同Euginia，「食魚生一定要揀店仔，入到舖頭先睇睇佢壽司枱個雪櫃先，款少色唔靚唔好食，座位一定要揀坐壽司枱，你識揀壽司枱坐，個師傅都知你係識食之人，整都會整件靚嘅畀你，而坐近魚生櫃可以睇得清楚魚生色澤，就算唔新鮮佢都無得賴話係燈光問題，想食邊嚿指邊嚿，咁就肯定新鮮。」
睇路搵食
君日本料理（28933917）
地址：跑馬地昇平街1-5號地下B店
營業時間：12nn-3pm、6pm-11pm
座位：40個
