梁詠琪（GiGi）近排承認感情暫時一片空白，同法籍男友Sly嘅愛火熄滅，唱片事業又停滯不前，有雜誌仲話佢同前經理人Stephanie關係勢成水火，認真屋漏兼逢連夜雨。
提醒抹嘴
不過馮仁昭前日竟然喺中環ifc商場撞到呢對傳聞中嘅寃家，佢哋仲同埋一個男人三人行飲下午茶。見佢哋席間有講有笑，氣氛好融洽，真係唔似不和喎，最後仲由GiGi碌卡埋單請客㖭。Stephanie又好細心提醒GiGi個嘴唔亁淨，叫佢用紙巾清理。
據知同行嘅男伴係Stephanie個老公，雖然Stephanie已經離職GiGi嘅經理人公司年代，但佢哋依然保持良好關係，仲趁住星期日一齊去Hightea，謠言正好不攻自破。其實Stephanie因為另有好發展先離職，GiGi對呢次引起嘅負面新聞，唔係好開心，因為擔心會影響大家嘅友情，GiGi見到有人影相，即刻話：「你哋見到我哋一齊食嘢咪知（冇不和）。」Stephanie事後仲幫GiGi截的士離開。
