之前車路士同阿仙奴因為踢聯賽盃決賽，所以到聽晚先補番踢英超，阿仙奴會作客維拉，車仔就去曼城。
維拉季初曾經保持連續9場不敗，到季中就跌晒watt，近16場超聯淨係贏過榜尾屈福特同韋斯咸。佢哋目前無降班壓力，爭歐洲賽又唔夠分，鬥志成疑。阿仙奴3周內失晒今屆捧盃希望，聯賽同曼聯相差成20分，雖則踢少兩場，數字上仲有機會，但大家心中有數，𠵱家惟有希望保住前4有份踢下屆歐聯。近16次阿仙奴遇維拉取得11勝5和，佔晒上風，往績咁好，唔揀佢都唔得啦！
曼城同同市曼聯命運差好遠，連輸4場後，曼城已經跌落降班旋渦。曼城近5場只入過1球，加埋個豆腐後防，唉！雖然話踢少兩場啫，再唔改善，連查爾頓都後來追上就弊。對手車路士𠵱家喺3項盃賽叫緊糊，除主場勁外，作客都唔失禮，勝出率有6成幾，往績仲一面倒食住曼城㖭！94年至今15次交手贏過12次，論近況同鬥志，車仔都係必然之選。
阿鵬
有線球彩台主持
電郵：[email protected]