真係唔知點樣形容熱刺，由輸可以變贏，同時，又可以由贏變和，以上講嘅係熱刺近3場波嘅表現！上回合足協盃，完場前KO布拉加，依家返到主場，「和波」已經夠出線，無謂博！
仲記得上星期六，小弟喺度預測車路士會好辛苦先至贏到熱刺，點知車仔真係踢得好辛苦，最終都係和波！由此證明，熱刺並非善男信女！特別係貝碧托夫，佢加盟熱刺無耐已經融入英超踢法；經過利華古遜多年訓練，加上呢位來自保加利亞前鋒腳下及頂上功夫了得，睇嚟足協盃對住布拉加，熱刺出線應該無問題！
另外，我會留意薩克達對西維爾，上一回合，大家打成平手，不過，西維爾輸咗兩個作客入球，依家處於被動，今次作客要「焗攻」，真係好想知佢打真軍嘅力量！一直重視足協盃嘅西維爾，聯賽又留力輸畀塔拉戈納，睇嚟佢哋真係會搏命，瞓身要西維爾客勝都唔係過份！最後，英超賽事，我唔需要考慮，當然係要車路士客勝啦！
周鵬
商業1台《球迷集中贏》主持
電郵：[email protected]