機迷至愛之一《ArmoredCore4》即將在XB360上推出，相信又有唔少人會打到天昏地暗、日夜不分，連發夢都諗緊如何操熟部機出戰，呢隻被香港網友私底下將名字改為「阿媽箍牙4」XB360新作，一向都係機械人遊戲大作之一，今集更着重提高遊戲速度同壓迫感，走得快，打得更爽快，難怪試過嘅人都話因為打得太激，搞到「發夢都諗住佢！」。
記者：許福合
數據多到嘔 難上手
發夢都諗緊如何令機體變強，《AC4》內繼承歷代《AC》系列傳統，作為機師嘅你，可以為機體作詳細設定，而且系統仲會幫你計埋有咩需要，又或者要加裝哪種特別配件，除咗電腦提供屬性數字之外，仲要計埋自己戰鬥習慣，如愛用埋身肉搏定係遠距離射擊，設定同配件都要作出相應調整，咁仲唔止㗎，連機身加埋有無超重同耗油量，見到咁多數字，你話唔發夢都諗住真係幾難！不過每次「煩腦」過後，見到愛機強勁咗咁多，又覺得辛苦都係值得，打得勁真係好爽，再加埋今集《AC4》特色之一，所有裝甲所配備引擎，都能以1,000km/h極速移動，而且不限時，全速飛行時，真係刺激到熱血上升。
XB360VSPS3畫質
毫無疑問，《AC4》絕對係XB360大作之一，淨係強化繪圖特效，製作出來嘅光影效果，已夠晒令人印象深刻，再加上保持水準場景同戰鬥場面，戰鬥時激光橫飛，過百粒飛彈從天而至嘅末日場面，視覺效果真係非常震撼。與PS3版《AC4》比較，唔少PS3玩家都反映「當放一大堆導彈或擊落大量導彈而爆炸時，畫面就會窒到不得了！」而玩XB360就唔多覺，唔通真係一如網上傳言，PS3實際效率，比XB360要差？
其實XB360版同PS3版一樣，都無支援高清畫面輸出，玩家只能睇到720p畫面，以XB360版而言，算係流暢度同畫面取得平衡，部份場景會出現大量機械人互相炮轟，畫面都唔覺窒，百人廝殺嘅場面，真係發夢都諗住！
最多8人網上對戰
當實際上到戰場，畫面設計亦都值得一讚，甚至比前作做得更細緻，資料同所有戰場數據都一清二楚，隨時可以睇住剩下血量同彈藥，而且畫面角度比以往大，可以見到晒機背，敵人來襲時都可以更早發覺。雖然《AC4》有改進，不過亦有要彈嘅地方，尤其係《AC》向來被人話難玩，原因之一除咗係難上手，最困難仲係無自動鎖定敵機功能，要顧住行動同時，又要同時瞄準敵機，真係要三頭六臂！
XB360遊戲一向強調對Live支援，同玩單機版唔同，《AC4》只要連上XBLive，可以最多同8個玩家對戰，結識世界各地高手，每次打贏一場，真係發夢都笑醒。
記者感受：畫面一流 但熟習需時
試玩意見中，評分最高一定係畫面，始終現時所謂大作遊戲，十居其九都以畫面行先，畫面差反而令人意外，不過仍然有遠景模糊嘅問題，睇來係廠商偷工減料之舉。而操作困難度一如以往，即使玩過前作，仍需要一定時間熟習操作，系統亦複雜，新手上手較難。
Profile
機種：XB360
廠商：FromSoftware
類型：動作
人數：1-2人（連線最多8人）
推出日期：4月
售價：未定
