係人都鍾意晒命，內地網上近期掀起一陣晒工資浪，由公務員到企業打工仔，紛紛將自己嘅糧單，包括人工、津貼，甚至基金供款等都列出來，堪稱國情大公開。
在搜狐理財論壇（ http://club.money.business.sohu.com/businessmain.php?c=82&b=licai），「珠三角05年畢業的老師2月份工資條」、「北京四星酒店女主管的月收入」、「一名12年軍齡軍官的工資條」等「晒工資」帖子處處可見。當中教育、公務員、石油石化、郵政以及銀行等職業點擊率最高，顯示呢五類工最好搵。
晒人工最特別嘅係，好多公務員嘅底薪少得可憐，但各類津貼加埋卻高達數千蚊。好似深圳一名兩年資歷嘅教師，底薪係774元，但特區、崗位、特殊津貼等加加埋埋竟有6,279元津貼，係底薪嘅八倍。
有網民將呢班晒人工嘅分成炫耀型、抱怨型同探聽型三類。不過，由於內地資訊封閉，各地區嘅情況差天共地，晒人工其實係為咗比較下同一種職業，自己嘅人工係咪合理就真。
