現今世代，要搵個專一長情的男人的確唔容易，連做咗汽車修理技師超過30年的姜師傅，都話咁耐以嚟只係見過一個。
姜師傅從事汽車維修業多年，熟客仔無數，相識超過20年嘅都大有人在，不過好多時都係人熟車唔熟，皆因個個客仔隔無耐就換車，搞到姜師傅有時都醒唔起邊部車屬於邊個車主，但只有一位叫做Albert嘅仁兄係例外。
呢位任職社會福利官嘅Albert（化名），80年買咗一部ToyotaCelicaTA40，一直揸到2005年要移民，先至萬般不捨咁忍痛賣畀收藏家代為照顧，即係話部車足足陪咗Albert25年！做得社會福利官，斷估唔會連新車都買唔起一部，而且舊車多病痛、零件又缺乏、耗油量又高，能夠接受呢位「老婆」嘅缺點咁多年，全靠一份初戀的感覺。
CelicaTA40係Albert第一部車，所以對佢有一份好特別嘅感覺，無論幾殘舊都一直唔捨得攞去劏去賣，寧願隔無耐花幾萬蚊同佢大修一次，兼且仲要忍受住無零件要等日本原廠訂做之苦。咁仲唔止，到後期更因為部Celica實在太舊，連保險公司都唔受保，Albert就惟有加入香港老爺車會（擁有車齡在20年或以上的汽車車主，先至有資格加入老爺車會），以老爺車名義申請保險，而且保單仲列明部車只有車主先可以揸，又要限制每年行走里數，總之麻煩多多，不過Albert依舊義無反顧，咁多年嚟，直到移民前一刻，喺佢名義下擁有嘅車，依然只得呢部ToyotaCelicaTA40。一個男人可以長情成咁，的確感人。
記者：之達