不同的偶像吸引不同的fans，黎姿和鄭嘉穎在商場宣傳新劇，其間向現場觀眾派玫瑰花，黎姿fans表現斯文，更有富貴女fans送上紫色玫瑰，原來該fans還曾送上家傳玉器給黎姿；鄭嘉穎的女影迷則表現猴擒，伸手硬搶他的玫瑰，嚇得他大叫兼後退。
無綫新劇《寫意人生》昨日在葵芳舉行宣傳活動，一眾演員黎姿、鄭嘉穎、高鈞賢和朱慧敏等齊齊出席，眾人除了比賽以左手寫書法外，穿上低胸裝的黎姿和朱慧敏俯身玩插花遊戲時最搶鏡。當眾演員向現場觀眾派玫瑰花時，鄭嘉穎的女影迷表現最瘋狂，更硬搶他手上的花，嚇得他不斷退後，要急急叫她們別搶。
曾獲贈家傳寶玉
至於黎姿的其中一位女fans則十分慷慨，除了之前送上家傳寶玉外，昨日更送上紫色玫瑰，黎姿說：「佢間中都畀利是送禮物，有時派埋利是畀我屋企人同助手，仲試過送家傳寶玉畀我，我估呢幾年收嘅禮物應該有六位數字喇。我經常都呼籲fans唔使花咁多錢，我𠵱家就儲起晒佢，將來捐去慈善機構。」
問黎姿對新劇收視可有信心？她說：「冇諗過呀，做好本份就得喇，如果收視真係好，叫監製（梁材遠）請食鮑參翅肚。如果收視過咗30點，我就攞3,000蚊抽獎，升1點就加1,000蚊，如果鄭生（鄭嘉穎）唔介意就一齊夾錢，都係諗住慰勞班同事。」
嘉穎欲秘密結婚
至於再次與黎姿合作，鄭嘉穎表示若大家傳緋聞也沒辦法。對於周麗淇曾口窒窒回應與他的緋聞，他說：「我講嘢都唔流利，講嚟講去三幅被，總之我係咪拍拖都唔會講，結婚或者會公布，最好好似郭晉安咁，結咗婚先話畀大家知。」
採訪：王連連 攝影：陳偉權
