寫呢個blog嘅教訓係，遇到不平事唔投訴係唔得嘅！前幾日收到滙豐銀行濫發嘅手機短訊，話提供免費覆盤短訊畀我，等我知道買賣股票結果！心諗銀行競爭真係咁激，滙豐主動到濫發短訊搶客？
我立刻打電話去滙豐話我冇股票戶口，唔要呢項服務。接線小姐用我嘅身份證號碼翻查後，話我冇戶口，可能有用戶填錯咗手機號碼，咁啱係我嘅電話號碼，先至收到個短訊。無心之失，咁可唔可以改番呢？對方竟然話：「我幫你唔到喎！」
有冇搞錯！佢解釋話，系統要靠用戶身份證號碼查戶口資料，即係要嗰個客打去滙豐提供ID，先至可改正電話號碼。咁個失魂客一世冇發覺錯咗，我咪成世都收到咁嘅短訊，仲係人哋投資買賣嘅私隱喎！（個短訊寫住佢買邊隻股同幾錢㗎！）
我發火一輪話會投訴，佢嘅上司先回覆我話會改番。咁點解之前又話唔得？佢好寸咁答：「唔係唔得，但要用多啲資源啫！」咁咪即係唔投訴就唔理？消委會總幹事Connie話如果唔係市民嘅錯失，銀行有責任搞番掂。佢又提醒大家小心填寫呢類服務嘅電話，填錯咗隨時俾人睇到私隱。
逢周一至周四刊出