香港人口老化、人口增長率低，加上市民收入差距拉闊，如果你唔係社會學家，而係市場學家，你會點樣觀察呢個情況呢？理論性嘅嘢，留番畀學者研究，市場上嘅「企業家」（entrepreneur）就眼光銳利，針對香港人口結構，專吼中坑市場，因為四十零歲至六十歲左右嘅人口最多，荷包脹。人哋日本喺十幾年前已講「銀髮一族」市場，香港商家𠵱家先至發現「新大陸」，仍然未遲。如果仍然迷信年輕人市場，搵嚟搞啫，年輕人人口唔算多，收入唔穩定，買唔起高價貨（除非父母找數），即使俾你霸咗唔少年輕人市場，咁又點？現時三十五歲至七十歲嘅人口多過○至三十五歲嘅人口，差距仲會逐漸拉闊㖭，任何產品（包括報紙雜誌）如果過份向年輕人市場傾斜，唔見得會有着數。
呢日聽汽車Ｌ講，除咗一啲有幾十個月花紅嘅金融界青年才俊之外（佢哋多數要買兩座位跑車），汽車市場比較倚賴三十五歲或以上嘅買家，新興買家就係三十幾歲嘅女士，某隻零售價六十幾萬嘅新車，四分一買家屬於此類，汽車Ｌ愈來愈發覺賣車須要加多幾錢感性，因為女車主受落也。
賣演唱會飛亦係如此，披圖梁喺四月推出ONJ演唱會，就係針對中坑市場。樂仕更係呢個市場嘅老手，人哋搞演唱會注重新進歌星（好多中坑認為新進歌星唱歌係用喉嚨發聲嘅），樂仕老早就專搵老人家來港演唱（如Peter,Paul&Mary）一至三場，搞咗咁多年，發覺賣座不俗，中坑擁躉甚多，於是樂此不疲，喺三月份又推出ElainePaige演唱會。呢位英國女歌星唱歌絕對用丹田氣，今日嘅新進歌星點有氣去唱IDon'tKnowHowtoLoveHim，Memory，Don'tCryforMeArgentina以及現代歌劇大師LordWebber嘅音樂劇呀！老實講，識得欣賞ElainePaige嘅中坑，肯定係教育程度比較高嘅中產，唔怪得演唱會票價由最便宜嘅五百八十元至最貴嘅二千三百八十元，鍾意聽衞蘭嘅觀眾或者會覺得ElainePaige好貴好貴。