好多人問：「黃金嘜好，定係原裝牌子機好？兩者都是用不同牌子硬件砌出來的電腦，有分別嗎？」
如果是經常同時開啓多個軟件工作，那就一定要用牌子機。
全公司只是我和伺服器用緊黃金嘜，伺服器好正常，但我的黃金嘜電腦就撞到阿媽都唔認得。公司所用的電腦多會使用會計、入數等軟件，複雜性比遊戲軟件還要低，但永遠是黃金嘜的頭號殺手，據我的經驗，最常撞是Sound和USB插頭，一旦進入5個軟件齊開的情況下，就會出現Hang一半機的情況，即還有一兩個軟件運作，但一轉畫面，就會全Hang。
如果一定要用黃金嘜電腦作商用機，最好是所有硬件都是同一間大廠出品，例如華碩底板、華碩顯示卡等，就可保持最穩定的狀態。
現時公司最常用的牌子機是Dell和HP，Dell一個電話就送貨，又有黃金嘜的自選式組合，加上最近新機外形好Hi-Class，一排Dell咁，價錢平，望落去好Hi-Tech，老闆巡房又唔失禮。
手提電腦？我最愛不是Dell喎，是IBM，因為……（待續）
Bytheway
男人砌黃金嘜，一個字：「型。」
自己落場抄件，自己組裝，有成功感，一旦死機，打開機蓋，全是自己了解的硬件，扮勁親手修理，在女友面前狂吹自己是電腦專家。
男人用耐了黃金嘜，一個字：「煩。」
成日Hang機，最大原因是底板過熱，死Harddisk，打散部機都找不到原因。
男人再買機都是黃金嘜，兩個字：「身痕。」
再買機，自然買番黃金嘜，因為身痕，貪勁，將最勁的硬件組合一起，又可在朋友面前威風，成為話題。
結果……由「男人砌黃金嘜」開始過。
所以，香港男女使用電腦的比例雖然不大，但高登黃金商場的顧客總是男人佔大多數。
文：伍旋卓