三亞冇王管 遊客全家被打

三亞冇王管 遊客全家被打

「如果你想花錢買氣受,去海南吧!」熱門旅遊點海南,喺遊客眼中原來係一個風景如天堂、服務如地獄嘅九反之地︰小販隨意圍毆遊客,豪華團竟是一日七次購物嘅呃秤團,由的士、食肆到酒店,全部串埋一齊呃遊客錢。

最離譜係當地派出所、旅遊局等部門,竟「官匪勾結」。旅遊危險指數絕對係最危險嘅5,想去玩嘅港人要三思而行。上個月25日,四川遊客一家五口到海南著名景區「天涯海角」玩。正當腳踏幼沙、欣賞海天一色美景時,突然衝嚟幾個中年女小販,兜售紀念品。男事主嘅阿爸拒絕購買後,其中一人竟用力推佢;再搶下佢嘅拖鞋打佢塊面,打爛眼鏡。好快,十數名小販將佢全家包圍,拳打腳踢、扯佢哋頭髮,男事主更被人箍頸,外圍小販將沙拋向佢哋。

受害人反被罰款100

10幾分鐘後,幾個景區保安才出現,將事主一家帶到天涯邊防派出所。一名姓黃所長指經調查,係「遊客毆打他人」需罰款100蚊。事主拒絕被屈後一直滯留派出所,其間打110報案中心以及三亞旅遊質量監督所,卻無人理,結果滯留9個鐘後喺凌晨先離開。好多網民氣憤地話︰「這就是中國現狀,為了錢都喪心病狂了!」
( http://bbs.lotour.com/
dispbbs.asp?boardID=50&ID=
66938&page=1)

海南是熱門旅遊地點,但也危機處處。 新華社