北海（701）2月11號推介過，見報日0.217元，對上星期五仍然高企0.243元，唔肯跟其他股仔大散，呢隻冷灶要昅實。對上星期，殼股金匡（286）因市場憧憬注資轉型，最高升幅達到2.3倍，再冇核心業務嘅中富（1191），亦閒閒哋翻半番。北海雖然無受氣氛感染，但上星期所見，歐資大行買盤出籠，大戶竟然對呢隻市值不足4億嘅股仔產生興趣。
又北海經過早幾年去蕪存菁，已經亁淨到不得了，有轉型動作，又有乜出奇。而呢期集團涉足祖國殯儀業，似係新嘗試。睇睇有基金揸貨嘅外國著名殯儀股DignityPLC，P/B高企5倍樓上，北海現價NAV折讓，講緊40%，當係炒新業務兼炒NAV折讓，北海已經有得諗。炒北海NAV收窄到30%，股價見0.285元，潛在升幅17%，折讓收窄到20%，北海要見0.328元，升幅35%。
五礦PE超低
五礦資源（1208）獲阿媽五礦集團注入氧化鋁貿易業，已經好醒神，估佢06年度純利8億銀樓上，PE講緊得4、5倍，咁吸引嘅PE水位，鋁業股之中，五礦可以橫掃。
再講，五礦呢期加碼發行5年期、10億銀嘅可換股票據，票據仲要係「零息」。就當平常五厘息嘅機會成本，以持有人換股價2.925元計數，打和價講緊3.73元，五礦現價不過2.77元。就博五礦上到3.73元，回報率都34%。