恒指如坐過山車，上個禮拜梅花間竹咁升一日、跌一日，繼周四升256點之後，周五又回番40點，唔少之前趁低位撈貨嘅散戶一定好開心，因為賬面都賺唔少。不過，買咗中國林大（910）嘅股民就要食定驚風散，事關林大逆大市而行，周四急跌近8%，周五又彈番14%，未放貨嘅散戶都唔知跳船逃生，抑或再坐一會睇定啲好？有網友就急不及待喺《香港討論區》呼籲其他網友快啲沽貨，止蝕離場。
其實，炒林大嘅主要原因，都係想炒新股三林環球（3938）嘅影子概念，林大自今年初1.06元已經開展升浪，至2月尾更攀升至1.43元歷史高位，升幅高達35%；不過，跟隨近期大市回落影響，林大嘅股價好似食咗瀉藥咁，跌至周五嘅0.9元，累跌37%，唔能夠喺高位放貨嘅散戶，當然喊咁口。
網友350D話：「我之前1.33元入林大，1.03元都被迫要止蝕離場，原本想喺1.1元放，點知放唔到，好灰！」money8945亦稱：「幾日插近五成，真係冇眼睇。」
炒影子股 唔對路快走
hk_wing就呼籲：「炒影子股，有得走就好走啦，見唔對路就要散水，唔係就好易坐艇。」股下股下同意話：「其實之前升咗好多，接火棒嗰啲就慘，應該盡快止蝕嘞。」
wah202更笑言：「林大主席個名改得好貼切，叫『吳良好』，唔止唔良好，簡直冇良心，喺1蚊樓上入貨嘅散戶俾佢害死。」雖然主席個名同股價走勢冇直接關係，但高追嘅網友實在好嬲先至咁講。hataip2最後就建議：「放晒林大，入三林好過，業務較廣泛，上升空間會多好多。」