地產代理有好多千奇百怪嘅促銷手法，對行外人嚟講，有時都幾耐人尋味。pinocchio1027喺《Uwants討論區》寫咗段一個博大霧經紀嘅對話同大家分享。
「我06年10月尾租咗個舖，210方呎，5500蚊月租，因為要攞牌同入貨，到3月中至做到生意，今日我發現大閘寫咗個電話號碼，話我個舖位放租，咁我就多多事幹打去八卦吓，以下係我同地產公司職員嘅對話：
我：我想問XX大廈XX號舖大概幾多呎？
佢：350呎咁上下。
我：有冇閣樓？
佢：冇（實情有個同舖位一樣大嘅閣仔）。
我：咁業主開幾錢租呀？
佢：8000蚊。
我：吓？左右嗰啲都係四千五蚊咋喎？（有一間仲3500蚊㖭）
佢：唔貴喇，有晒豪裝，新嘅3匹分體冷氣、落地玻璃，電線全部新拉過，地板仲係意大利雲石！（若然豪裝係天花牆同地板都只有石屎同窿嘅意思，最大嗰件電器叫做飛利浦100火釘頭燈膽，咁我都唔知咩叫冇裝修。落地玻璃有，我裝嘅）
亂開價 充豪裝
我：咁呀，幾時可以去睇睇呀？
佢：幾時都得，我同業主熟有晒鎖匙！
我：我見佢大閘落咗鎖頭，你唔好去到又話睇唔到呀！
佢：鎖頭？哦，係我鎖落去嘅。
我：個鎖頭有晒唔知咩公司嘅標誌喎，得唔得㗎？
佢：梗得，個標誌咪係我公司嘅囉，我哋幾落本，連鎖頭都自己鑄埋。（實情個鎖頭係我以前租嗰間迷你倉嘅）
我：……
佢：唏，唔好諗囉，蘇州過後冇艇搭，個舖好多人想租，我同個業主熟，可以傾平啲㖭！
我：係呀？我同個業主唔熟，舊年10月租咗都係5500蚊，多咗嗰啲你食咗呀？仲有，你話有晒舖頭鎖匙，咁我唔換鎖喇，不過以後我舖頭啲貨唔見咗就問你。頭先傾咗咁耐我都唔記得講你聽，為咗提升服務質素，之前嘅對話我錄咗音，晏啲會拎去差館備案；仲有呀，若然你得閒，麻煩你經過我舖頭就去抹咗個電話號碼啦，唔該晒！」
上述係一個代理行內「撈生意」手法，佢哋會吼住啲冇開好耐嘅舖或寫字樓，係唔係都落個牌話「業主委託出售/出租」，有人打嚟就攞聯絡電話，儲埋幾個就搵業主傾，勸佢賣或放租；如果搵唔到業主或說服唔到佢，就當多咗班客，方便日後介紹其他舖或寫字樓。