今年初有單新聞引起全城關注，就係1名透過入境事務處投資移民計劃來港定居的「新移民」，前年底以650萬元購買1隻股票，短短1年股價暴漲逾5倍，勁過美國股神畢菲特。正當人人都在追尋邊隻股票嘅時候，有報章估計撇除三四線股外，最接近嘅股應係05年11月上市的中國龍工（3339），以招股價1.43元計，至06年12月底升值5.43倍，若以龍工05年12月底計，升幅為5.05倍。
估呢隻股，因為夠膽幾百萬銀一注去買，必定係對公司好有信心，另外，亦有可能喺呢間公司做過，對公司發展有一定認識。睇番龍工呢間公司，其實係內地輪式裝載機生產商之龍頭，雖然並非散戶熱門之選，但係就獲多家大行長期睇住，包括荷銀同大摩首次納入研究範圍叫買，目標價分別15.13元及16.80元，睇落符合落重注條件。
最新一份係上星期里昂叫買龍工，目標價睇17.25元，係暫時睇得最樂觀嘅大行。除咗睇報告之外，公司較早前發通告表示正磋商出售股份予獨立第三者，有大行已估計係外資大型設備製造商，入股後隨時又會有新合作，到時大行會睇得更樂觀。無論如何，即使龍工已升唔少，但係既然通告都講到明有利好消息，不妨跟新移民股神炒一轉。
Penta大跌市買嘉國
曾教授早排推介嘉華國際（173），當時細價股正炒得最熱，教授建議吼啲橫行股，推介後股價連續兩日勁升，風頭一時無兩。呢隻教授愛股，上周五港交所（388）股權變動資料顯示，Penta投資顧問喺上星期一，即係最恐慌跌市當日買入2.83球嘉國，平均價2.75元，差唔多係近期最低水平，係繼2月頭以2.59元買8球貨之後嘅入市行動。嘉國炒完一轉𠵱家又回落番3元樓下低位，淨係計大芬敢大跌市去買呢隻股，已經俾到信心，可逢低吸納。