揀股票，市盈率（P/E，市價同盈利比率，指每股市價除以每股盈利，通常作為股票平貴的指標，越低越抵）係重要指標之一，但原來揀男人亦可以應用此比率。女網友DahuXmm喺《中金在線》上，以過來人姿態向姊妹傳授揀股（揀老公）方法。
佢話對一個男人嚟講，市盈率就係佢嘅身價或者佢可以畀你嘅嘢（身家同肯花錢比率），所以男人並唔係越多錢越好，而係越肯為你花錢越好。比如一個身家過百萬嘅男人，花一萬蚊請你去旅行；同另一個每月只得500蚊生活費嘅男人，肯嘥200蚊買個熊啤啤畀你，你嫁邊個呢？
肯分1/20身家 至算合格
按照上述理論，前一個男人嘅市盈率係100倍，後一個係2.5倍，明顯後者市盈率比較低，買（嫁）得過。因為有能力的男人唔會永遠每個月只得500蚊，當佢嘅收入隨能力增長嘅時候，可以畀你嘅亦會越嚟越多。
DahuXmm仲話，如果男人肯將自己嘅1/20身家拎出嚟畀你，即PE20倍，咁佢已經算達到平均水平。
除咗市盈率，仲要睇公司屬性，嫁老實男人就正如大藍籌，屬慢熱型，勝在穩陣，升嘅時候唔會升得太多，但跌嘅時候佢亦唔會跌得好深；佢哋會默默咁做好多事情，所謂點滴在心頭，反正日子耐咗總會釀出自己嘅幽香。
浪子高風險股 隨時跳車
至於嗰啲浪子型男人，絕對係高風險股，只可以曾經擁有，千祈咪諗住同佢天長地久，激情過後，就要隨時準備落車。
DahuXmm又話，錯過某隻連升幾倍嘅股票，女人可以做嘅，就係認真揀下一隻優質股票（男人），而唔係坐喺度唉聲歎氣兼揼心。其實適合自己嘅男人又點止得一個，錯過一個就好睜大眼揀下一個，好好把握。
另外，股票止蝕好重要，正如揀錯男人，千萬唔好唔捨得放，投入越多，蝕得更多。
網友風雨走過回應，「揀股票同揀男人本質上一樣，揀定優質資產，以自己認可嘅成本同風險持有，最後獲益。」
不過，有網友話老實男人亦難保不會越軌，君不見滙豐（005）早前亦發盈警，與其揀大藍籌，不如自己發掘一隻準藍籌新貴，又平又正升值潛力又高。
