請大家做好心理準備，《戰狼300》將會讓你經歷一個前所未有咁震撼嘅睇戲經驗！齋睇個預告片，已經興奮到爆，但裏面所睇到嘅壯觀場面都唔夠全套戲嘅十分之一，係咪好鬼期待呢！可以肯定睇完呢套片，你實會記得入面打得壯烈嘅斯巴達戰士，同埋將會聲價十倍嘅天才導演沙克薛達（ZackSnyder）！ 撰文：戶川淳
本周四（15日）正式喺本地上映嘅《戰狼300》，係繼《罪惡城》（SinCity）後另一部改編自美國漫畫大師FrankMiller作品嘅真人電影，原著喺1998年出版，由Frank同妻子LynnVarley合編，內容同構圖相當大膽，今次由新晉導演沙克薛達主理，佢上次重拍喪屍片經典《DawnoftheDead》嘅《活死人凶間》，玩味、驚嚇同震撼力十足，估唔到今次喺《戰》片仲有更加厲害嘅突破。
幼童森林退餓狼
《戰狼300》故事以史上有名嘅「溫泉關戰役」為主題，講述公元前480年，波斯大軍攻打斯巴達，斯巴達國王雷奧尼達率領300位精兵迎戰。呢班戰士細細個就俾人丟入森林同餓狼搏鬥，可以有命行得番出森林，自然勁打得！佢哋聯合其餘城邦4,000人，死守希臘要塞溫泉關，同百萬大軍展開浴血戰。
呢場壯烈戰役，喺歐美世界傳頌千古，早喺60年代已被拍成電影《決死雄師》（The300Spartans），少年時代嘅FrankMiller就係睇咗呢齣戲，啓發佢畫出《300》呢本漫畫。電影版亦盡量參照漫畫嘅風格處理，導演沙克薛達仲要求曾主演《歌聲魅影》（PhantomoftheOpera）嘅謝拉畢拿（GerardButler）等男演員，進行四個月地獄式特訓，等個個演員以貨真價實嘅六嚿勁凸腹肌、fit爆身形，拍攝糅合咗中、日、泰以及歐洲傳統武藝嘅打鬥場面。
影像凌厲場面激
全片唔止節奏明快，拳拳到肉嘅搏鬥場面喺震耳欲聾嘅HeavyMetal歌曲襯托下，綻放出型到爆嘅暴力美學。全片採用類似《罪惡城》入面嘅藍布幕拍攝手法，99.9%廠景拍攝，背景一概用電腦執出嚟，打造出嚟嘅震撼大場面，同《魔戒》（LordoftheRings）都有得揮，睇嚟有機會提名明年奧斯卡！