《現金流投資論壇》最近出現一位股壇新手，被窩輪嘅神秘感同槓桿效應吸引住，連正股都未玩過，就學人炒輪。點知真係唔好彩，遇到大市調整，結果身家每日以15%嘅速度縮水，大喊學費好貴。
呢位新手叫tamwayne，佢話：「覺得自己好倒楣，原本以為可以一嘗賺快錢嘅滋味，不過就撞啱跌市，十買九輸。」佢最後發現炒輪其實有好多睇唔到嘅因素，特別係人為因素，但就笑言：「因為難玩，咁先至好玩。」
波幅市 轉眼蝕
其他網友見到咁嘅情況，都出言相勸，SamuelKary好佩服tamwayne嘅做法，不過建議佢先了解多啲正股同大市走勢嘅預測，再配合基本同技術分析，之後玩輪就安全得多嘞。miracle亦話：「新手就應該先玩正股，一開始玩輪，一定嚇死都得。通常炒輪係會預輸晒先，股價跌40%都未必需要止蝕（睇情況）。如果蝕10至20%就止蝕，咁相信喺波幅市好易會俾人震出嚟。」vinchung好同意咁話：「一入市就學炒輪，仲要喺咁大浪嘅時候，應先睇吓股票參考書，玩吓細股，感受吓波幅先啦。」
ispchoy更分享炒輪嘅感受話：「炒輪如果每日能夠賺10至20%已經好滿足，但其實好難做到，特別喺大市反覆上落時，根本好難跟，止蝕又唔想，驚止蝕完之後就勁升；唔止蝕又係咁輸，真係好慘。」
其實無經驗嘅投資者，應該先玩正股，習慣一吓波幅較細嘅正股，之後先好玩輪；不過一眾網友就好佩服tamwayne嘅勇氣，仲話輸錢都係一種投資經驗喎。