噚日，我哋特區損失咗400萬，大家可能會問：「係旅發局整sim卡蝕咗，定係高明輝你想話電影基金俾人拎咗400萬去玩女明星？」兩樣都唔係，而係喺黃大仙區，有一名雙失青年，懷疑因為吸天拿水神志不清，墮樓身亡，非常可惜。特區除咗損失400萬，亦都可能係失去咗一個可能成為DavidWebb咁，專幫小股東出頭嘅人。
就喺上個星期，南韓現代汽車嘅一次股東大會，有一名年僅17歲嘅雙失青年，自稱手持七十五股現代汽車嘅股份（以上星期收市價每股67700韓圜計算，佢嘅股票大概值港幣四萬二左右），喺股東大會殺現代管理層一個措手不及。
一開波，嗰名雙失青年已經問：「我見到個股東大會有好多現代嘅員工喺度做媒喎，作為股東，我要求你哋叫佢哋返去工作。」
現代汽車總裁金東晉：「……」
之後嗰名雙失青年再問：「豐田喺美國使咗唔少錢去lobby喎，你哋又會點應付呀？」
金東晉：「我哋都會出多啲錢去lobby嘅……」
香港富豪第二代都爭氣
會後，記者問咗嗰位雙失青年好多嘢，佢話：「我雖然啱啱喺高中退學，但目標係要入讀首爾國立大學，仲要成為一個有責任感嘅商人，我最唔鍾意嗰啲承繼老竇股份嘅人……」咪住先，按照呢個「邏輯」，當佢真係有75股現代，佢得17歲，已經有差唔多4萬港元嘅股票，唔好話畀我聽佢係自己儲零用錢買番嚟㗎。
好彩，佢臨尾補番句：「……而又唔出席股東大會。」更加好彩嘅係，我哋香港嘅富豪第二代，都冇衰畀呢位南韓朋友仔睇，例如李家大公子多年來都有出席股東大會，二公子差少少，咁多年冇出席，因為佢自己開咗第二間。
呢位南韓青年做雙失都可以做得咁出位，橫掂香港啲雙失青年咁鍾意認威，去買丸啪又係用屋企錢，不如問阿媽拎啲錢，買隻股票，去股東大會一舉成名！