客人排隊等位時間多過食麵嘅味千拉麵，就快喺香港上市，華華醒起，舊年去日本旅行時嘅一件趣事。
話說導遊講講吓去邊度搵嘢食時，就講到香港無人不曉嘅味千拉麵，導遊話，想同日本仔做生意唔係咁易，當年味千老細後生嗰時，就係去咗日本做壽司學徒，機緣巧合之下，識到日本味千嘅老細，咁大家傾落幾啱傾，就傾到中港澳味千嘅代理返嚟。
身為味千粉絲嘅華華，見到味千行政總裁潘慰，就梗係要問吓啦，點知潘總話，導遊講嗰件事完全唔係咁，仲講起日本味千起源。
日本考察團遇社長
話說日本味千係由原籍客家嘅松本先生1968年所創，發迹於拉麵勝地──九州熊本。潘總就喺94年，參加日本考察團，認識味千社長，雙方一拍即合，就同日本通鄭威濤齊齊在港搞味千，搞到有聲有色，年年賺過千萬，真係咪睇小女人呀。
唔知味千上市後，會唔會請股東去日本食熊本味千拉麵呢？
[email protected]