今個禮拜，喺呢個欄呢個位，大家都唔會見到白銀戰隊隊長孫柏文。大家可能會問：「孫柏文係咪離棄咗我哋白銀戰隊，走咗去紙幣狂魔嘅陣營，去咗沽白銀？」喺呢一度，我高明輝好鄭重咁同大家講，孫柏文並冇離棄白銀戰隊，佢只係走咗去大嶼山梅窩──又名銀礦灣──嗰度游吓水，順便思考吓白銀戰隊未來嘅大方向，所以今個禮拜，大家暫時都見唔到孫柏文。
花旗國債券出訊號
臨走之前，孫柏文又再次發功講減息，好值得我寫出嚟同大家分享吓。
孫柏文：「聯儲局9月前一定減息！」
高明輝：「孫柏文又嚟發功啦！又再次預言，跟住到9月又再次會面懵懵喇！」
孫柏文：「冇錯！如果係我預言『9月前一定減息』，相信就算係我，對住一塊鏡咁講，鏡裏面嘅人都會唔信。好彩，預言嘅唔係我，而係omniscient嘅債券市場。」
高明輝：「咁即係點？」
孫柏文：「到前日為止，花旗國債券市場已經從FedFundsFuture嘅債券價格，出訊號話會有100%機會，聯儲局喺佢哋8月或之前嘅會議減息。現在花旗國樓市狀況，按揭放債公司出事，債券價格反映減息事在必行，我都冇異議。甚至如果喺短期之內，有更多花旗國按揭放債公司，真係可能會更早減息。FedFundsFuture嘅債券價格，一向以嚟都可以好準確預測聯儲局利息走勢，所以就算聯儲局死都話仲係『關注通脹』，相信減息將會快降臨。」
高明輝：「祝你好運，希望到咗9月，冇人話你係黑氣石啦！」