喺啱啱過咗嘅星期五,本報專欄作家方卓如寫咗篇《股市風水佬》嘅文章,批評「堪輿學家插手入股市,遺害比財經演員更深」,迅即惹來《Uwants討論區》嘅網友熱烈和應留言。
Jackysiuwai毫不客氣咁批評:「沉迷術數買股票,禍害一生!」Mmxmmxmm亦好同意:「用術數去分析股票,真係不知所謂!」
Alex298就話:「啲風水佬預測股市,講中咗就聲名大噪,講錯咗就當自己發噏風。」
Sanwen119仲自嘲嘲人,「可能自己命犯1398(即工行),所以一買即跌。」Clas好心痛咁話:「搞到堂堂『國際金融中心』怪力亂神!」
網友Lilith13好低死咁講:「其實去馬騮山捉隻醒少少嘅馬騮去預測,中嘅機會極有可能同班風水佬估嘅差不多,甚至高過30%亦一啲都唔出奇。」
K2a3i4亦笑指:「咁我下次可以試吓擲公字,睇吓嗰日升定跌,可能仲準㖭!」
1205就諗到:「古今中外歷史,國之將亡,必術數大興,清末都有咁嘅情況,而近來香港每事皆有術數,莫非香港末日已到?」
唔係你財唔入你袋
Uahcl自稱曾研習堪輿,略懂皮毛:「財運係天生,人人不同,即使俾你知道明天大市會升,如果你冇財運,根本沾不到利益。用堪輿去預測股市走勢,並唔係完全沒可能,但異數太多,非一般江湖術士能做到!」